LX.

L'empereres Morchufles, com il oï qu'il venoient einsi, si nes osa atendre, ainz fui toz jorz deus jornées ou trois devant. Et einsi s'en ala trosque vers Messinople, où l'emperere Alexis ere; et li envoia ses messages, et li manda que il li aideroit, et feroit tot son comandement. Et l'empereres Alexis respondi que bien fust-il venuz com ses fils, que il voloit que il eust sa fille à fame, et feroit de lui son fil. Einsi se herbergea l'empereres Morchufles devant Messinople, et tendi ses trefs et ses paveillons; et cil fu herbergiez dedenz la cité. Et lors parlèrent ensemble, et li dona sa fille; et s'alièrent ensemble, et distrent que il seroient tot une chose.
Einsi sejornèrent, ne sai quant jorz, cil en l'ost et cil en la ville; et lors semonst l'emperere Alexis l'empereor Morchufles que il venist à lui mengier, et iroient ensemble as bainz. Einsi com il fu devisé, si fu fait. L'empereres Morchufles i vint privéement et à peu de gent; et com il fu dedenz sa maison, l'empereres Alexis l'apela en une chambre, et le fist jeter à terre, et traire les œils de la teste, en tele traïson com vos avez oï. Or oïez se ceste gent devoient terre tenir ou perdre, qui si granz crualtez faisoient li un des autres. Et quant ce oïrent cil de l'ost l'empereor Morchufle, si se desconfisent et tornent en fuite, li un çà, et li autre là; et de tels i ot qui alèrent à l'empereor Alexi, et li obéirent com à lor seignor, et remestrent entor lui.

LXI.

Lors s'esmut l'empereres Baudoins à tote s'ost de Constantinople; et chevaucha tant que il vint à Andrinople. Enqui trova Henri son frere, et les autres genz qui avec lui furent. Totes les genz parmi là où il passa vindrent à lui, à sa merci et à son comandement. Et lors lor vint la novele que l'empereres Alexis avoit traiz les œils à l'empereor Morchufle. Mult en fu granz parole entr'eus; et bien distrent que il n'avoient droit en tere tenir, qui si desloiaument traïssoient li uns l'autre. Lors fu li conseils l'empereor Baudoin qu'il chevaucheroit droit à Messinople, où l'empereres Alexis ere. Et li Grec d'Andrinople li requistrent com à seignor qu'il lor laissast la ville garnie, por Johan, le roi de Blaquie et de Bougrie, qui guerre lor faisoit sovent. Et l'empereres Baudoins i laissa Eustaice de Saubruic, qui ere uns chevaliers de Flandre mult preuz et mult vaillanz, et cent serjanz à cheval. Einsi s'en parti l'emperere Baudoins d'Andrinople, et chevaucha vers Messinople, où il cuida l'empereor Alexi trover. Totes les terres par là où il passa vindrent à son comandement et à sa merci; et quant ce vit l'empereres Alexis, si vuida Messinople et s'enfui. Et l'empereres Baudoins chevaucha tant que il vint devant Messinople. Et cil de la ville vont encontre lui, et li rendent la ville à son comandement. Et lors dist l'empereres Baudoins que il séjorneroit por atendre Boniface le marquis de Monferrat, qui n'ere mie encor venuz en l'ost, porce que il ne pot si tost venir com l'emperere, qu'il en amenoit avec lui l'empereris sa fame. Et chevaucha tant que il vint vers Messinople, sor le flum; et enqui se herberja, et fist tendre ses trefs et ses paveillons. Et l'endemain ala parler à l'empereor Baudoin et lui veoir, et li requist sa convenance.
«Sire, fait il, noveles me sont venues de Salonique, que la gent del païs me mandent que il me recevront volontiers à seignor. Et je en sui vostre hom, et la tieng de vos: si vos vuel proier que voz me laissiez aler; et quant je serai saisiz de ma terre et de ma cité, je vos amenrai les viandes encontre vos, et viendrai appareilliez de faire vostre comandement. Et ne me destruiez mie ma terre; et alons, se vostre plaisir est, sor Johan, qui est rois de Blaquie et de Bougrie, qui tient grant partie de la terre à tort.»

LXII.

Ne sai par cui conseil l'empereres respondi qu'il voloit aler totes voies vers Salonique, et feroit ses autres afaires en la terre. «Sire, fait Bonifaces li marquis de Monferrat, je te proi, dès que je puis ma terre conquerre sanz toi, que tu n'i entres; et se tu i entres, ne me semble mie que tu faces por mon bien. Et sachiez vos de voir, je n'irai mie avec vos, ainz me partirai de vos.» Et l'empereres Baudoins respondi que il ne lairoit mie por ce qui il n'i alast tote voie. Halas, com mauvais conseil orent et li uns et li autres, et com firent grant pechié cil qui ceste mellée fisent! quar, se Dieu n'en preist pitié, com eussent perdue tote la conqueste que il avoient faite, et la crestienté mise en aventure de périr! Einsi partirent par mal l'empereres Baudoins de Constantinople et Bonifaces li marquis de Monferrat, et par mauvais conseil.
L'empereres Baudoins chevaucha vers Salonique, si com il ot empris, à totes ses gens et à tote sa force. Et Bonifaces li marquis de Monferrat retorna arrière, que il ot une grant partie de bone gent avec lui. Avec lui s'en torna Jacques d'Avesnes, Guillaumes de Chanlite et la graindre partie de toz ceus de l'empire d'Alemaigne, qui se tenoient au marquis. Einsi chevaucha li marquis arrière trosque à un chastel qui li Dimos ere apelez, mult bel, et mult fort, et mult riche; et cil fu renduz par un Grieu de la ville; et com il fu dedenz, si le garni. Et lors comencent li Grieu à lui à torner par l'acointement de l'empereriz, et de tote la terre de là entor, à une jorné ou à deus, venir à sa merci.
L'empereres Baudoins chevaucha adès droit à Salonique, et vint à un chastel qui ot à nom Cristople, qui ere uns des plus forz del monde; et li fu renduz, et li firent fealté cil de la ville. Et après vint à un autre que on apeloit la Blanche, qui ere mult fors, et mult riches; et li fu renduz autresi, et li firent fealté. Et d'enqui chevaucha à la Serre, qui ere une citez forz et riche; et vint à son comandement et à sa volenté, et firent fealté. Et d'enqui chevaucha à Salonique et se herberja devant la ville, et i fu par trois jors. Et cil li rendirent la ville (qui ere une des meillors et des plus riches de la crestienté à cel jor), par tel convent que il les tiendroit as us et as costumes que li empereur Grieu les avoient tenuz.

LXIII.

Endementiers que l'empereres Baudoins ere vers Salonique, et la terre venoit à son plaisir et à son comandement, li marquis Bonifaces de Monferrat, à tote la soe gent et la grant plenté des Grecs qui à lui se tenoient, chevaucha devant Andrinople, et l'asist; et tendi ses trefs et ses paveillons entor. Et Eustaiches de Saubruic fu dedenz, et les genz que l'empereres i avoit laissié; et montèrent as murs et as tors, et s'atornèrent d'eus defendre. Et lors prist Eustaices de Saubruic deus messages, et les envoia, par jor et par nuit, en Constantinople. Et vindrent au duc de Venise et au comte Loeys, et à ceus qui estoient dedenz la ville remés de par l'empereor Baudoins, et lor distrent qu'Eustaices de Saubruic lor mandoit que l'empereres et li marquis estoient mellé ensemble; et li marquis ere saisiz del Dimot, qui ere uns des plus fors chastiaus de Romenie et uns des plus riches, et eus avoit asis à Andrinople. Et quant il oïrent ce, si en furent mult irié, que lors cuidèrent-il bien que tote la conqueste que il avoient faite fust perdue.
Lors assemblèrent el palais de Blaquerne li dux de Venise et li cuens Loeys de Bloys et de Chartein, et li autre baron qui estoient en Constantinople; et furent mult destroit et mult irié, et mult se plainstrent de ceus qui avoient faite la mellée entre l'empereor et le marquis. Par la proière le duc de Venise et del comte Loeys, fu requis Joffrois de Ville-Hardoin, li mareschaus de Champaigne, qu'il alast au siège d'Andrinople, et que il meist conseil à cele guerre, se il povoit, porce qu'il ere bien del marquis; et cuidèrent qu'y eust plus grant povoir que nuls autres hom. Et cil, por lor prière et por lor besoing, dist qu'il iroit mult volentiers; et mena avec lui Manassier de l'Isle, qui ere uns des bons chevaliers de l'ost et des plus honorez. Einsi se partirent de Constantinople, et chevauchièrent par lor jornées tant que il vindrent à Andrinople, où li sièges ere. Et quant li marquis l'oï, si issi de l'ost et ala encontre eus. Avec lui en ala Jaques d'Avesnes, et Guillaumes de Chanlite, et Hues de Colemi, et Othes de la Roche, qui plus haut estoient del conseil del marquis. Et quant il vit les messaiges, si les honora mult et fist mult bel semblant.
Joffrois li mareschaus, qui mult ere bien de lui, l'ocoisona mult durement: coment ne en quel guise il avoit prise la terre l'empereor ne assiegiée sa gent dedenz Andrinople, tant que il l'eust fait assavoit à ceus de Constantinople, qui bien li feissent adrecier se li empereres li eust nul tort fait. Et li marquis se descolpa mult, et dist que port le tort que l'empereres li avoit fait, avoit-il einsi esploitié. Tant travailla Joffrois li mareschaus de Champaigne, à l'aide de Dieu et des barons qui estoient del conseil del marquis, de qui il ere mult amez, que li marquis li asseura que il s'en metroit el duc de Venise, et el comte Loeys de Blois et de Chartein, et en Coenon de Betune, et en Joffroi de Vile-Hardoin le mareschal, qui bien savoient la convenance d'eus deus. Einsi fu la trive prise de ceus de l'ost et de ceus de la cité. Et sachiez que mult fu volentiers veuz Joffrois li mareschaus, au retourner, et Manessiers de l'Isle, de ceus de l'ost et de ceus de la cité, qui mult volentiers voloient la paix d'ambedeus parz. Et ausi lié com li Franc en furent, et furent li Grieu dolant, qu'il volsissent mult volentiers la guerre et la mellée. Einsi fu dessiegiée Andrinople; et torna s'en li marquis arriere au Dimot à tote sa gent, là où l'empereris sa fame ere.

LXIV.

Li message s'en revindrent en Constantinople, et contèrent les noveles si comme il avoient esploitié. Mult orent grant joie li dux de Venise et li cuens Loyes de Blois et tuit li autre, de ce qu'il s'ere mis sor eus de la paix. Lors pristrent bons messages, et ecristrent lettres, et envoierent à l'empereror Baudoin; et li manderent que li marquis s'ere mis sor eus, et bien l'avoit asseuré; et il s'i devoit encor mieuz metre. Si li prioient qu'il le feist (que il ne souffriroient mie la guerre en nule fin), et qu'il asseurast ce que il diroient ausi com li marquis avoit fait.
Endementres que ce fu, l'empereres Baudoins ot fait ses afaires vers Salonique; si s'en parti et la laissa garnie de sa gent, et il laissa chevetaine Regnier de Monz, qui ere mult preuz et vaillanz. Et les nouvelles li furent venues que li marquis avoit pris le Dimot, et que il ere dedenz, et que il avoit grant partie de la terre entor conquise, et assise sa gent dedens Andrinople. Mult fu iriez l'empereres Baudoins quant la novele li fu venue, et mult s'enhasti que il iroit dessieger Andrinople, et feroit tot le mal qu'il porroit au marquis. Ha Dieu! quels domages dut estre par cele discorde, que se Dieu n'i eust mis conseil, destruite fust la crestientez.
Einsi s'en repaira l'empereres Baudoins par ses jornées. Et une mesaventure lor fu avenue devant Salonique mult granz, que d'enfermeté furent acouchié mult de sa gent. Assez en remanoit par les chastiaus où l'empereres passoit, qui ne povoient mais venir; et assez en aportoit-on en littières qui à grant mesaise venoient; et mult en ot de mors à la Serre. Lor fu morz maistre Johans de Noyon à la Serre, qui ere chanceliers l'empereor Baudoin; et mult fu bons clers et mult sages, et mult avoit conforté l'ost par la parole de Dieu, qu'il savoit mult bien dire. Et sachiez que mult en furent li prodome de l'ost desconforté.
Ne tarda gaires après que il lor avint une mult granz mesaventure, que morz fu Pierre d'Amiens, qui mult ere riches et hauz hom, et bons chevaliers et proz; et s'en fist mult grant duel li cuens Hues de Saint-Pol, cui cousins germains il ere; et mult en pesa à toz ceus de l'ost. Lors fu après Girars de Manchicort morz, qui ere mult prisiez chevaliers; et Giles d'Aunoi, et mult de bone gent. En cele voie demourèrent quarante chevalier, dont l'ost fu mult afeblie.

LXV.

Tant chevaucha l'empereres Baudoins par ses jornées qu'il encontra les messages qui venoient encontre lui, que cil de Constantinople li envéoient. Li uns des messages fu uns chevaliers de la terre le comte Loeys de Blois et ses hom liges; et fu apelez Beghes de Fransures, sages et enparlez; et dist le message son seignor et les autres barons mult vivement, et dist: «Sire, li dux de Venise et li cuens Loeys mis sires, et li autre baron qui sunt dedenz Constantinople, vos mandent salut com à lor seignor; et se plaignent à Dieu et à vos de ceus qui ont mise la mellée entre vos et le marquis de Monferrat; que par poi qu'il n'ont destruite la crestienté, et vos feistes mult mal quant vos les en créistes. Or si vos mandent que li marquis s'est mis sor eus del contenz qui est entre vos et lui; si vos prient com à seignor que vos vos i metez ausi, et que vos l'aseurez à tenir. Et sachiez que il ne souffriroient la guerre en nule fin.»
L'empereres Baudoins ala, si prist son conseil, et dist qu'il lor en respondroit. Mult i ot de ceus del conseil de l'empereor, qui avoient aidié la mellée à faire, qui tindrent à grant outrage le mandement que cil de Constantinople li avoient fait, et li distrent: «Sire, vos oez que il vos mandent, que il ne souffriroient mie que vos vos vengissiez de vostre anemi. Il est avis que se vos ne faisiez ce qu'il vos mandent, que il seroient encontre vos.» Assez i ot grosses paroles dites; mais la fin del conseil si fu tele que l'empereres ne voloit mie perdre le duc de Venise, ne le comte Loeys, ne les autres qui erent dedenz Constantinople; et respondi au message: «Je n'aseurerai que je me mete sor eus; mais je m'en irai en Constsantinople sanz forfaire au marquis neient.» Einsi s'en vint l'empereres Baudoins par ses jornées tant qu'il vint en Constantinople; et li baron et les autres gens alèrent encontre lui, et le reçurent à grant honor com lor seignor.

LXVI.

Dedenz le quart jor, conut l'empereres clerement que il avoit esté mal conseilliez de mesler soi au marquis; et lors parla à lui li dux de Venise et li cuens Loeys, et distrent: «Sire, nos vos volons proier que vos vos metez sur nos, ausi com li marquis s'i est mis.» Et l'empereres dist que il le feroit mult volentiers. Et lors furent eslit li message qui iroient querre le marquis, et le conduiroient. De ces messages fu li uns Gervaises del Chastel, et Reniers de Trit li autres, et Joffrois li mareschaus de Champaigne li tierz; et li dux de Venise i envoia deus des suens.
Einsi chevauchièrent li message par lor jornées, tant que il vindrent au Dimot; et trovèrent le marquis et l'empereris sa fame à grant plenté de bone gent, et li distrent si com il l'estoient venu querre. Lors li requist Joffrois li mareschaus, si com il li avoit asseuré, que il venist en Constantinople por tenir la paix tele com cil la deviseroient sor qui il s'ert mis, et il le conduiroient sauvement et toz ceus qui avec lui iroient.
Conseil prist li marquis à ses homes. Si i ot de ceus qui li otroierent que il i alast, et de ceus qui li loerent qu'il n'i alast mie. Mais la fins del conseil si fu tele qu'il ala avec eus en Constantinople, et mena bien cent chevaliers avec lui; et chevauchièrent tant pat lor jornées que il vindrent en Constantinople. Mult fu volentiers veuz en la ville; et alèrent encontre lui li cuens Loeys de Blois et de Chartein, et li dux de Venise, et mult d'autre bone gent; que il ere mult amez en l'ost. Et lors assemblèrent à un parlement; et la convenance fu retraite de l'empereor Baudoins et del marquis Boniface; et li fu Salonique rendue et la terre, en tel manière que il meist en la main Joffroi le mareschal de Champaigne le Dimot, dont il ere saisiz; et cil li creanta que il le garderoit en sa main trosque adonc que il aroit creant message ou ses letres pendanz, que il ert saisiz de Salonique; et adonc le rendroit à l'empereor ou à son comandement. Et einsi fu faite la paix de l'empereor et del marquis com vos avez oï. Et mult en orent grant joie l'ost, que ce ert la chose dont granz domages povoit avenir.

LXVII.

Lors prist li marquis congié, et s'en ala vers Salonique, à totes ses genz et à tote sa fame; et si com il venoit de chastel en chastel, si li furent rendu de par l'empereor, et la seignorie tote. Et vint à Salonique; et cil qui la gardoient la rendirent de par l'empereor. Et li chevetaines que l'empereres y avoit laissié, qui ere apelez Reniers de Mons, si fu morz, qui mult ere prodom; dont granz domages fu de sa mort. Lors se commença la terre et li païs à rendre au marquis, et granz partie à venir à son comandement, fors que uns Grieus, hauz hom, qui ere apelez Lasgur. Et cil ne volt mie venir à son comandement, que il ere saisiz de Corinthe et de Naples, deus citez qui sor mer sient, des plus forz desous ciel. Et cil ne volt mie venir à la merci del marquis; ainz le commença à guerroier, et granz pars des Grieux se tindrent à lui. Et uns autres Grieus qui ere apelez Michalis, et ere venuz avec le marquis de Constantinople, et cuidoit estre mult bien de lui; mais il se departi de lui qu'il n'en sot mot, et s'en ala à une cité que on apeloit l'Arthe, et prist la fille à un riche Grieu qui tenoit la terre de par l'empereor, et se saisi de la terre, et comença le marquis à guerroier.
Et la terre de Constantinople trosque Salonique ere en si bone paix, que li chemin erent si seur que il i povoient bien aler qui aler i voloient; et si avoit d'une cité à autre bien doze jornées granz. Et fu jà tant del temps passé, que il ere à l'issue de septembre. Et l'empereres Baudoins fu en Constantinople, et la terre fu en paix et à sa volenté. Lors furent dui mult bon chevalier mort en Constantinople, Eustaices de Canteleu et Aimeris de Villeroy; dont granz domages fu à lor amis.
Lors comença l'on les terres à departir: li Venicien orent la lor part, et l'ost des pelerins l'autre. Et quant chascuns sot assener à sa terre, la convoitise del monde, qui tant aura mal fait, nes laissa estre en paix; ainz comença chascuns à faire mal en sa terre, li uns plus et li autre moins; et li Grieu les comencièrent à haïr et à porter mauvais cuer. Lors dona l'empereres Baudoins au comte Loeys la duchée de Niqué, qui ere une des plus hautes honors de la terre de Romenie, et séoit d'autre part del Braz, devers la Turquie. Et tote la terre d'autre part del Braz n'ere mie venue à la merci l'empereor, ainz ere contre lui. Lors après dona la duchée de Finepople à Renier de Trit. Et lors envoia li cuens Loeys de ses homes por sa terre conquerre, bien six vins chevaliers; de ceus si fu chevetaines Pierres de Braiecuel et Paiens d'Orléans. Et cil s'en partirent à la feste Toz Sainz de Constantinople, et passèrent le Braz Saint-George à navie; et vindrent à l'Espigal, une cité qui sor mer siet, et ere poplée de Latins. Et lors comencièrent la guerre contre les Grecs.

LXVIII.

En cel termine, si avint que l'empereres Morchufles, qui avoit les œils traiz (cil qui avoit meurtri son seignor l'empereor Alexi, le fil l'empereor Isaac, celui que li pelerin avoient amené en la terre), s'enfuioit outre le Braz coiement et à peu de gent. Et Thierris de Los le sot, cui il fu enseigniez; si le prist et l'amena l'empereor Baudoin en Constantinople. Et l'empereres Baudoins en fu mult liez, et en prist conseil à ses homes, qu'il en feroit d'home qui tel meurtre avoit fait de son seignor. A ce fu acordez li conseils, que il avoit une colonne en Constantinople enmi la ville auques, qui ere une des plus hautes et des mieuz ovrées de marbre qui onques fust veue d'œil; et enqui le feist mener et lo feist saillir aval, voyant tote la gent: que si haute justice devoit bien toz li mondes veoir. Einsi fu menez à la colonne l'empereres Morchufles, et fu menez sus; et toz li peuples de la cité acorrut por veoir la merveille. Lor fu boutez aval, et chaï de si haut que quant il vint à terre que il fu toz esmiez.
Or oïez une grant merveille: que en cele colonne dont il chaï aval, avoit ymages de maintes manières, ovrées el marbre. Et entre celes ymages, si en avoit une qui ere laborée en forme d'empereor, et cele si chaoit contreval; car de lonc tems ere prophetisié qu'il auroit un empereor en Constantinople qui devoit estre jetez aval cele colonne. Et einsi fu cele semblance et cele prophecie averée.
En icel termine, ravint autresi que li marquis Bonifaces de Monferrat, qui ere vers Salonique, prist l'empereor Alexi (qui ere cil qui avoit à l'empereor Isaac traiz les yeux), et l'empereris sa fame avec. Et envoia les houses vermeilles et les dras emperials l'empereor Baudoin son seignor, en Constantinople, qui mult bon gré l'en sot; et il envoia puis après l'empereor Alexi et l'empereriz sa fame, en prison en Monferrat.

LXIX.

A la feste Saint-Martin après, s'en issi Henris, li freres l'empereor Baudoin, de Constantinople, et s'en ala contreval le Braz trosque à Boche d'Avie; et mena bien six vins chevaliers avec lui de mult bone gent. Et passa le Braz à la cité que on appele Avie, et la trova mult bien garnie de toz biens, de blez et de viandes, et de totes choses qui mestier ont à cors d'home. Et il se saisi de la cité, et se herberja dedenz; et lors comença la guerre contre les Grecs endroit lui. Et li Hermins de la terre, dont il en i avoit mult, se comencièrent à torner dever lui, qu'il haioient mult les Grecs.
A cel termine, se parti Reniers de Trit de Constantinople, et s'en ala vers Finepople, que l'empereres Baudoins li avoit donée. Et enmena bien avec lui six vins chevaliers de mult bone gent; et chevaucha tant par ses jornées que trespassa Andrinople, et vint à Phinepople. Et les gens de la terre le reçurent, et li obéirent com à seignor, qu'il le virent mult volentiers. Et il avoient mult grant mestier de secors, que Johans li rois de Blaquie les avoit mult appressez de guerre. Et il lor aida mult bien, et tint grant partie de la terre; et la granz partie, qui s'ere tenue devers Johan, se torna devers lui. Enqui endroit refu la guerre granz entr'eus.
L'empereres rot bien envoié cent chevaliers passer le Braz Saint-George endroit Constantinople. De ceus si fu chevetaines Machaires de Sainte Menehault; avec lui ala Mahieus de Vaslaincort et Roberz del Ronçoi. Et chevauchièrent à une cité qui ere apelée Nichomie, et siet sor un golfe de mer; et ere bien deus jornées loing de Constantinople. Et quant li Grieu les oïrent venir, si vuidièrent la cité et s'en alèrent; et il se herbergièrent dedenz, si la garnirent et refermèrent; et recomencièrent à guerroier de cele marche endroit eus. La terre d'autre part del Braz si avoit seignor un Grieu que on apeloit Toldres li Ascres. Et avoit la fille l'empereor Alexi à fame, dont il clamoit la terre (celui que li Franc avoient chacié de Constantinople, et qui avoit à son frere traiz les yeus). Icil si tenoit la guerre contre les Francs outre le Braz, partot là où il estoient. Et l'empereres Baudoins fu remés en Constantinople, et li cuens Loeys, à peu de gent; et li cuens Hues de Saint-Pol, qui malades ere d'une grant maladie de goute qui le tenoit es genous et es piez; et li dus de Venise, qui goute ne veoit.

LXX.

En icel termine après, vint uns granz passages de ceus de la terre de Syrie, et de ceus qui l'ost avoient laissiée et estoient alé passer as autres passages. A cel passage vint Estenes del Perche et Regnaus de Monmirail, qui cosin estoient le comte Loeys, qui mult les honora et fu mult liez de lor venue. Et l'empereres Baudoins et les autres genz les virent mult volentiers, qu'il estoient mult haut home et mult riche, et amenèrent grant plenté de bone gent. De la terre de Syrie vint Hue de Tabarie, et Raoul ses freres, et Thierris de Tendremonde, et granz plenté de la gent del païs, de chevaliers, de Turchoples et de serjanz. Et lors après si dona l'empereres Baudoins à Estiene del Perche la duchée de Philadelphie. Entre les autres fu venue une novele à l'empereor Baudoin, dont il fu mult dolenz; que la comtesse Marie sa fame, qu'il avoit laissiée en Flandres enceinte, por ce qu'ele ne pot avec lui movoir, la dame si ajut d'une fille; et après, quant ele fu relevée, si s'esmult et ala outremer après son seignor, et passa au port de Marseille. Et quant ele vint à Acre, si n'i ot gaires esté que la novele li vint de Constantinople (que li message son signour li conterent) que Constantinople ere conquise, et ses sires ere empereres; dont grans joie fu à la crestienté. Après cele novele, ot la dame en proposement de venir à lui. Si li prist une maladie, si fina, et morut; dont granz deuil fu à tote la crestienté, car ele ere mult bone dame et mult honorée. Et cil qui vindrent à cel passage en aportèrent les noveles; dont granz deuils fu à l'empereor Baudoin et à toz les barons de la terre, car il la desiroient mult avoir à dame.

LXXI.

En cel termine, cil qui estoient alé à la cité de l'Espigal, dont Pierres de Braiecuel et Paiens d'Orléans erent chevetaine, fermèrent un chastel que on apele Palorme; si le garnirent de lor gent, et puis chevauchièrent outre por conquerre la terre. Théodore Lascaris se fu porchaciez de tote la gent que il pot avoir; le jor de la feste monseignor saint Nicholas, qui est devant la Nativité, si s'entrecontrèrent es plains d'un chastel que on apele Pumenienor. Et si en fu bataille à mult grant meschief à la nostre gent, que cil avoient tant de gent que n'ere se merveille non, et li nostre n'avoient mie plus de sept vins chevaliers, sans les serjanz à cheval. Et Nostre Sire done les aventures einsi com lui plaist. Par la soe grace et par la soe volonté li Franc vainquirent les Grejois et les desconfirent, et cil i reçurent grant domage. Dedenz la semaine lor rendi-on de la terre grant part: on lor rendi le Pumenienor qui ere mult forz chastiaus, et le Lupaire qui ere une des meillors citez de la terre, et le Pulinach qui séoit sor un lac d'aigue douce, un des plus forz chastiaus et des meillors que il convenist querre. Et sachiez que mult fu bien pris à cele gent; et mult fisent bien en la terre lor volenté par l'aide de Dieu.
En icel termine après, par le conseil des Hermins, Henris, li freres l'empereor Baudoin de Constantinople, parti de la cité d'Avie et la laissa garnie de sa gent; et chevaucha à une cité que on apele l'Andremite, qui siet sor mer à deus jornées de la cité d'Avie. Et ele li fu rendue, et il se herberja dedenz; et lor se rendi granz partie de la tere à lui; car la citez ere mult bien garnie de blez et de viandes et d'autres biens. Et lors si tint la guerre iqui envers les Grieus.
Theodore Lascaris, qui ot esté desconfiz vers le Pumenienor, porchaça de gent quanque il en pot avoir; et ot mult grant ost ensemble, et la charja à Costentin son frere, qui ere uns des meillors Gieus de Romanie; et chevaucha vers l'Andremite droit. Et Henris, li freres l'empereor Baudoin, le sot par les Hermines que mult granz ost venoit sor lui; si atorna son afaire, et ordena ses batailles; et il avoit avec lui de mult bone gent. Avec lui estoient Baudoins de Belveoir, Nicholes de Mailli, Ansials de Kaeu, et Thieris de Los, et Thieris de Tendremonde. Et einsi avint que le samedi devant mi-quaresme, vint Costentins Lascaris à sa grant ost devant l'Andremite. Et Henris, com il sot sa venue, si prist conseil et dist que il ne se lairoit jà laienz enfermer, ainz dist que il istroit fors. Et cil vint à tote s'ost et à granz batailes à pié et à cheval; et cil s'en issirent et comencièrent la bataille. Et i ot grant estor et grant mellée; mais par l'aide de Dieu, les veinquirent li Franc et desconfirent; et en i ot mult de morz et de pris, et mult fu granz li gainz. Et lors furent mult à aise et mult riche, que les genz del païs se tornèrent à eus, et comencièrent à aporter lor rentes.

LXXII.

Or vos lairons de ceus devers Constantinople, et reviendrons au marquis Boniface de Monferrat qui ert vers Salonique, et s'en fu alez sor Lasgur, qui tenoit Naples et Corinthe, deus des plus forz citez dou monde. Si les assieja andeus ensemble: Jacques d'Avesnes remest devant Corinthe, et autre bone gent assez; et li autre alèrent devant Naples, si l'asistrent.
Lors avint une aventure el païs: que Joffrois de Ville-Hardouin, qui ere niés Joffroi le mareschal de Romenie et de Champaigne, fils son frere, fu meuz de la terre de Syrie, avec celui passage qui ere venuz en Constantinople. Si l'enmena venz et aventure au port de Mouçon; et enqui fu sa nef empirie, et par estovoir le convint sejorner l'iver au païs. Et uns Grieus, qui mult ere sire del païs, le sot; si vint à lui et li fist mult grant honor, et li dist: «Biaus sire, li Franc ont conquis Constantinople, et fait empereor. Si tu te voloies à moi acompaingnier, je te porteroie mult bone foi, et conquerrions assez de ceste terre.» Einsi se jurèrent ensemble li Grieu et Joffrois de Ville-Hardoin; et conquistrent ensemble grant part de la terre; et trova Joffrois de Ville-Hardoin au Grieu mult bone foi.
Einsi com les aventures vienent si com Dieu volt, si prist au Grieu maladie; si fina et morut. Et li fils au Grieu se revela contre Joffroi de Ville-Hardoin et le traï; et se tornèrent li chastel qu'il avoit garniz contre lui. Et il oït dire que li marquis séoit devant Naples: à tant de gent com il pot avoir, si s'en vait encontre lui. Et chevaucha par mult grant peril bien six jornées parmi la terre; et vint à l'ost, où il fu mult volentiers veuz, et fu mult honorez del marquis et des autres qui i estoient; et il ere bien droiz, quar il ere mult preuz et mult vaillanz, et bons chevaliers.

LXXIII.

Li marquis li volt assez doner terre et avoit por ce qu'il remansist avec lui: il n'en volt point prandre; ainz parla à Guillaume de Chanlite qui mult ere de ses amis, et li dist: «Sire, je vieng d'une terre qui mult est riche, que on apele la Morée. Prenez de gent ce que vos en porrez avoir, et partez de ceste ost, et alons par l'aide de Dieu et la conquerons; et ce que vos m'en voudrez doner de la conqueste, je le tiendrai de vos, si en serai vos hom liges.» Et cil qui mult le crut et ama, ala au marquis, si li dist ceste chose; et li marquis li abandonna qu'il i alast.
Einsi se partirent de l'ost Guillaumes de Chanlite et Joffrois de Ville-Hardoin, et enmenèrent bien cent chevaliers avec eus, et de serjanz à cheval grant part; et entrèrent en la terre de la Morée, et chevauchièrent trosque à la cité de Monçon. Michalis oï qu'il estoient à si peu de gent en la terre; si amassa grant gent, et ce fu une merveille de gent, et chevaucha après eus, si com cil qui les cuidoit avoir toz pris et avoir en sa main. Et quant cil oïrent dire que il venoit, si hordèrent Monçon, qui de lonc tems iert abatue, et y laissièrent lor hernois et lor menue gent. Et chevauchièrent par un jor, et ordenèrent lor bataille de tant de gent com il avoient: et fu à trop grant meschief, que il n'avoient mie plus de cinq cens homes à cheval, et cil en avoient bien plus de cinq mil. Einsi com les aventures avienent si com Dieu plaist, se combatirent as Grieux, et les desconfirent et vainquirent. Et i perdirent mult li Grieu; et cil gaaignièrent assez chevaus et armes, et autres avoirs à mult grant plenté. Et lors s'en tornèrent mult lié et mult joiant à la cité de Moçon. Après chevauchièrent à une cité que on apele Corone, qui sor mer estoit; si l'asistrent. Et n'i sistrent gaires longuement, quant la citez lor fu rendue; et Guillaumes la dona à Joffroi de Ville-Hardoin, et cil en devint ses hom, et la garni de sa gent. Après alèrent à un chastel que on apele la Chalemate, qui mult ere fors et biaus; si l'asistrent. Icil chastiaus les travailla mult longuement; et tant i sistrent que renduz lor fu. Adonc se rendirent plus des Grecs à eus del païs que il n'avoient fait devant.

LXXIV.

Li marquis Bonifaces sist à Naples, où il ne pot rien faire, quar trop ere forz, et il i grave mult sa gent. Jaques d'Avesnes retenoit le siège devant Corinthe, si com li marquis l'i avoit laissié. Lasgur, qui ere dedenz Corinthe, et ere mult sages et enginieus, vit que Jaques n'avoit mie granz genz, et que il ne se gaitoit mie bien. A un matin, à l' ajornée, fist une saillie mult grant, et ala trosque enz es paveillons; et ainz que il peussent estre armé, en ocistrent assez. Là si fu morz Drues d'Estruen qui fu mult preuz et vaillanz, dont granz deuils fu. Et Jaques d'Avesnes, qui ere chevetaines, fu mult corrouciées de son chevalier; et ne demora gaires que il fu navrez en la jambe mult durement. Et bien li portèrent tesmoing cil qui là furent, que par son bien faire furent rescous; et sachiez bien que mult furent près d'estre tuit perdu. Et par l'aide de Dieu, les remistrent el chastel à force. Mais li Grieu n'orent mie la felonie fors de lor cuers, qui mult estoient desloial.
A icel temps, si virent qui li François estoient si espandu par les terres, que chascuns avoit afaire endroit lui: si se pensèrent que ore les povoient-il traïr. Et pristrent lor message privéement de totes les citez de la terre, et les envoierent à Johan qui ere rois de Blaquie et de Bougrie, qui les avoit guerroiez et guerreoit tot adès. Et li mandèrent que il le feroient empereor, et qu'il se rendroient tuit à lui, et que il ociroient toz les Francs; et si li jureroient que il li obéiroient com à seignor, et il lor jurast que il les maintendroit com les suens. Einsi fu faiz li sermenz.

LXXV.

En cel termine, si avint uns granz domages en Constantinople: que li cuens Hues de Saint Pol, qui avoit longuement geu d'une maladie de goute, fina et morut; dont il fu mult granz deuils et mult granz domages; et fu mult plorez de ses homes et de ses amis. Et fu enterrez à mult grant honor au mostier monseignor Saint George de la Mange. Et li cuens Hues si tenoit un chastel en sa vie, qui avoit nom li Dimos, et ere mult fors et mult riches; si i avoit de ses chevaliers et de ses serjanz dedenz. Li Grieu qui avoient les sermenz faiz au roi de Blaquie por les Francs occire et traïr, si les traïrent en cel chastel; si en ocistrent et pristrent grant part. Et eschapèrent peu; et cil qui eschapèrent s'en alèrent fuiant à une cité qu'on apele Andrinople, que li Venicien tenoient à cel jor. Ne tarda gaires après com cil d'Andrinople se revelèrent; et cil qui estoient dedenz et la gardoient, s'en issirent à grant peril et guerpirent la cité. Et les noveles vindrent à l'empereor Baudoin de Constantinople, qui mult ere à peu de gent, il et li cuens Loeis de Blois. De ces noveles furent il mult troblé et mult esmaié. Et einsi lor comencièrent noveles à venir de jor en jor mauvaises; que par tot se reveloient li Grieu, et là où il trovoient les Francs qui estoient bailli des terres, si les ocioient. Et cil qui avoient Andrinople guerpie, li Venicien et li autre qui avec erent, s'en vindrent à une cité que on apeloit le Churlot, qui ere l'empereor Baudoin. Enqui trovèrent Guillaume de Blanvel, qui de par l'empereor la gardoit. Par le confort que il lor fist, et par ce que il ala avec eus à tant de gent com il pot, si tornèrent arières à une cité bien à doze lieues près, qui Archadiople ere apelée, qui ere as Veniciens, et la troverent vuide; si entrèrent enz, si la garnirent. Dedenz le tierz jor, li Grieu del païs s'asemblèrent, si vindrent à ajornée devant Archadiople; si comencièrent l'asaut grant et merveilleus tot entor. Et il se defendirent mult bien; si ovrirent lor portes, si fistrent un assaillie mult grant. Si com Dieu le volt, si se desconfisent li Grieu; et cil les commencièrent à abatre et à ocire. Einsi les chacièrent une lieue, et en ocistrent mult, et gaaignèrent assez chevaus et autres avoirs mult. Einsi s'en revindrent à grant joie en la cité d'Archadiople, et cele victoire si mandèrent l'empereor Baudoin en Constantinople, qui mult en fu liez. Et neporquant n'osèrent retenir la cité d'Archadiople, ains s'en issirent l'endemain et la guerpirent, et s'en revindrent en la cité del Churlot. Enqui s'arestèrent à grant doute, que il doutoient autant ceus de la ville com il faisoient ceus de hors, que il estoient dou serment devers le roi de Blaquie, et devoient les Francs traïr. Et maint en i ot qui n'i osèrent arester, ainz s'en vindrent en Constantinople.

LXXVI.

Lors pristrent l'empereres Baudoins conseil, et li dux de Venise, et li cuens Loeys, et virent que il perdoient tote la terre. Et fu tels lor conseils que l'empereres manda Henri son frere, qui ere à l'Andremite, que il guerpist quanque il i avoit conquis, et le venist secoure. Li cuens Loeys en renvoia à Paien d'Orléans et à Pierron de Braiecuel qui erent à Lupaire, et à totes les gens que il avoient avec eus, que il guerpissent tote la conqueste, for seulement l'Espigal, qui séoit sor mer, et la garnissent à moins que il porroient de gent, et li autre le venissent secoure. L'empereres manda Machaire de Sainte Menehaut et Mahieu de Vaslencort et Robert del Ronçoi, qui bien avoient cent chevaliers avec eus et estoient à Nichomie, que il la guerpissent et le venissent secoure.
Par le comandement l'empereor Baudoin, issi Joffrois de Ville-Hardoin, li mareschaus de Romenie et de Champaigne, de Constantinople, et Manassiers de l'Isle, à tant de gent com il porent avoir; et ce fu mult peu, car la terre se perdoit tote. Et chevauchièrent trosque à la cité del Churlot, qui ere à trois jornées de Constantinople. Illuec trovèrent Guillaume de Blanvel, et ceus qui avec lui estoient, qui mult erent à grant paor; et lors furent mult asseuré. Enqui sejornèrent par quatre jorz. L'empereres Baudoins renvoia, après Joffroi le mareschal, quanque il povoit avoir de gent tout einsi com il venoient, tant que vint au quart jor que il orent quatre vins chevaliers au Churlot. Et dont s'esmut Joffrois li mareschaus, et Manassiers de l'Isle et lor genz; et chevauchièrent avant, et vindrent à la cité d'Archadiople; si se herbergièrent enz. Enqui sejornèrent un jor et d'enqui murent; si s'en alèrent à une autre cité que on apele Burgarofle. Et li Grieu l'orent vuidiée; si se herbergièrent dedenz. L'endemain chevauchièrent à une cité que on apele Nequise, qui ere mult bele et mult ferme, et mult bien garnie de toz biens. Et trovèrent que li Grieu l'orent guerpie, et s'en erent tuit alé à Andrinople. Et cele cité ere à neuf lieues françoises près d'Andrinople, et tote la grans plentez des Grecs ere à Andrinople. Et fu tels lor conseils qu'il attendroient iqui l'empereor Baudoin.

LXXVII.

Or conte li livres une grant merveille: que Reniers de Trit qui ere à Finepople, bien neuf jornées loing de Constantinople, et avoit bien six vins chevaliers avec lui, que Reniers ses fils le guerpi, et Giles ses frères, et Jaques de Bondies qui ere ses niés, et Achars de Verdun qui avoit sa fille. Et li tolirent bien trente de ses chevaliers; et s'en cuidoient venir en Constantinople; et l'avoient laissié en grant peril, com vos oez. Si trovèrent la terre revelée encontre eus, et furent desconfit; si les pristrent li Grieu qui puis les rendirent au roi de Blaquie, qui puis après lor fist les testes trenchier. Et sachiez que mult furent petit plaint de la gent, porce qu'il avoient si mespris vers celui à qui il ne le deussent mie faire. Et quant li autre chevalier de Renier de Trit virent ce, qui si près ne lui estoient com cil qui alé s'en estoient, si en dotèrent moins la honte; si le guerpirent bien quatre vins chevalier tuit ensemble, et s'en alèrent par une autre voie. Et Reniers de Trit remest entre les Grieus à peu de gent, que il n'avoit mie plus de quinze chevaliers à Phinepople et à l'Estanemac, qui ere uns chastiaus mult forz que il tenoit, où il fu puis longuement assis.

LXXVIII.

Or vos lairons de Renier de Trit, si reviendrons à l'empereor Baudoin, qui ert en Constantinople à mult peu de gent, mult iriez et mult destroiz. Et attendoit Henri son frère, et totes les autres genz qui erent outre le Braz. Et li premier qui vindrent à lui d'outre le Braz, ce furent cil de Nichomie, Machaires de Sainte Menehault et Mahieu de Vaslencort et Roberz del Ronçoi; et vindrent bien en cele route cent chevalier. Et quant l'empereres les vit, si en fu mult liez, et parla au comte Loeys, qui cuens ere de Blois et de Chartain; et fu tels lor conseils, que il distrent que il s'en istroient à tant de gent com il avoient, et sivroient Joffroi le mareschal de Champaigne qui devant s'en estoit alez. Halas! quel domage qu'il n'atendirent tant que tuit li autre fussent venu, qui d'autre part del Braz estoient; que peu avoient gent à si perilleus lieu où il aloient. Einsi issirent de Constantinople bien à sept vins chevalier; et chevauchièrent de jornée en jornée, tant que il vindrent au chastel de Nequise, où Joffrois li mareschaus ere herbergiez. La nuit pristrent conseil ensemble; la somme de lor conseil fu tele, que il iroient au matin devant Andrinople, et que il l'asserroient. Et ordenèrent lor batailles, et devisèrent mult bien de tant de gent com il avoient.
Et quant vint au matin, à cler jor, il chevauchièrent si com devisé ere, et vindrent devant Andrinople. Et la trovèrent mult bien garnie, et virent les gonfanons Joanisse, le roi de Blaquie et de Bougrie, sor les murs et sor les tors; et la ville fu mult fors et mult riche, et mult plaine de gent. Et il les assirent à mult peu de gent devant deus des portes; et ce fu li mardis de Pasque florie. Einsi furent par trois jorz devant la ville à grant mesaise et à peu de gent.

LXXIX.

Lors vint Henris Dandole qui ere dux de Venise; mais vieuz hom ere, et goute ne véoit. Et amena de tel gent com il ot, et bien autant com l'empereres Baudoins et li cuens Loeys en avoient amené; et se loja devant une des portes. L'endemain, recrurent d'une route de serjanz à cheval; mais bien fust mestiers que il vausissent plus que il ne valoient. Et si avoient peu de viande, que marchiés nes povoit suivre; ne il ne povoient aler forrer, que tant avoit des Grieus par le païs que il n'i povoient mie aler.
Johannis li rois de Blaquie venoit secoure ceus d'Andrinople à mult grant ost; que il amenoit Blas et Bogres, et bien quatorze mil Comains, qui n'erent mie baptizé. Por la destrece de la viande, ala forrer li cuens Loeys de Blois et de Chartein le jor de la Pasque florie. Avec lui ala Estienes del Perche li freres le comte Joffroi del Perche, et Renaus de Monmirail, qui ere freres le comte Henri de Nevers, et Gervaises del Chastel, et plus de la moitié de tote l'ost. Si alèrent à un chastel que on apele Peutaces, et le trovèrent mult bien garni de Grecs; et i assaillirent mult grant assalt et mult fort, ne n'i porent rien faire, ains s'en revindrent arrière sans nule conqueste. Einsi furent la semaine des deus Pasques; et fisent engins chapuisier de mainte manière, et mistrent mineors qu'il avoient par desouz terre, por le mur trenchier. Et einsi fisent la Pasque devant Andrinople à peu de gent et à peu de viande.

LXXX.

Lors vint novelle que Johans li rois de Blaquie venoit sor eus por secorre la ville. Si ordenèrent lor afaire; et fu devisé que Joffrois li mareschaus et Manessiers de l'Isle garderoient l'ost, et l'empereres Baudoins et tuit li autre istroient fors, se Johannis venoit à la bataille. Einsi demorèrent trosque au mercredi des féries de Pasques; et Johanis fu jà si aprochiez qu'il fu logiez bien à cinq lieues d'eus. Et envoia corre devant lor ost ses Commains; et li criz lieve en l'ost, et s'en issent à desroi. Et chacièrent les Commains une mult bone lieue mult folement; et quant il s'en voldrent venir, li Commain commencièrent à traire sor eus mult durement, si lor navrèrent de lor chevaus assez. Einsi s'en revindrent en l'ost, et furent mandé li baron en l'ostel l'empereor Baudoin. Et pristrent conseil, et distrent que mult avoient fait grant folie, qu'il avoient tant chacié tele gent qui estoient si legièrement armé. La somme del conseil fu tele que se Johannis venoit mais, que il istroient fors et se rengeroient devant lor ost, et que enqui l'atendroient, et d'enqui ne se movroient. Et y fisent crier par tote l'ost que nus ne fust si hardiz qu'il passast cel ordenement por cri ne por noise que il oïst. Et fu devisé que Joffrois li mareschaus garderoit devers la cité, et Manassiers de l'Isle.
Einsi trespassèrent cele nuit trosque au jeudi matin des féries des Pasques; et oïrent la messe, et mengièrent au disner. Et li Commain courent trosque à lor paveillons; et li criz lieve, et il corent as armes, et s'en issent de l'ost totes lor batailles ordenées, si com il avoient devisé devant.

LXXXI.

Li cuens Loeys s'en issi premiers à la soe bataille; et commence les Commains à porsivre, et mande l'empereor Baudoin que il le sivist. Halas! com malement il tindrent ce qu'il avoient devant devisé le soir! que einsi porsuirent les Commains, bien près de deus lieues loing, et assemblèrent à eus, et les chacièrent grant pièce. Et li Commain recourrent sor eus, et commencent à huer et à traire. Et li nostre gent orent bataille d'autre gent que de chevaliers, qui ne savoient mie assez d'armes; si s'escommencent à esfreer et à desconfire. Et li cuens Loeys, qui fu assemblés premiers fu navré en deus lieus mult durement; et li Comain et li Blac les comencièrent à envaïr; et li cuens ot esté chaüs, et uns suens chevaliers, qui ot nom Johans de Friaise, fu descendus, si le mist sor son cheval. Assez fu de la gent le comte Loeys qui li distrent: «Sire, alez vos en, quar trop malement navrez estes en deus lieus.» Et il dist: «Ne place Damedieu que jamais me soit reprové que je fuie de champ, et laisse l'empereor.»
L'emperere, qui mult ere chargiez endroit lui, rapeloit sa gent; si lor disoit que il ne fuiroit jà, et qu'il ne le laissassent mie: et bien tesmoignent cil qui là furent que onques mais cors de chevalier mieuz ne se defendi de lui. Einsi dura cil estors mult longuement: tels i ot qui bien le firent, et tels i ot qui le guerpirent. A la parfin, si com Dieu sueffre les mesaventures, si furent desconfit. Iqui remest el champ l'empereres Baudoins qui onques ne volt fuir, et li cuens Loeys: l'empereres Baudoins fu pris vif, et li cuens Loeys fu ocis. Halas! com dolereuse perte fu là faite! Là fu perduz li evesques Pierres de Bethleem, et Estienes del Perche li freres le comte Joffroi, et Renaus de Monmirail li freres le comte de Nevers, et Mahieu de Vaslencort, et Roberz de Ronçoi, Johans de Friaise, Gautiers de Nuilli, Ferris d'Ierre, Johans ses freres, Eustaices de Heumont, Johans ses freres, Baudoins de Nueville, et mult des autres dont li livres ne parole mie ci. Et li autre qui porent eschaper, s'en vinrent fuiant à l'ost.

LXXXII.

Et quant ce vit Joffrois li mareschaus de Champaigne, qui gardoit devant une des portes de la cité, si s'en issi plus tos que il pot à la gent que il ot; et manda Manassier de l'Isle, qui gardoit l'autre porte, que il le suist isnellement. Et chevaucha à tote sa bataille, encontre les fuianz, grant aleure; et li fuiant se receuillirent tuit à lui. Et Manassiers de l'Isle, qui vint au plus tot que il pot à la sue gent, si se joinst à lui; et lors orent plus grant bataille; et tuit cil qui vindrent en la chace, qu'il porent retenir, si les mistrent en lor bataille. Et ceste chace si fu entre none et vespres einsi retenue. Li plusor furent si esfreé que il fuioient par devant eus trosque enz es paveillons et enz es hostels. Et einsi cele chace fu recovrée com vos avez oï; et li Comain s'arestèrent, et li Blac et li Grieu qui chaçoient. Et hardièrent à cele bataille as ars et as sajettes; et cil de la bataille se tindrent quoi, les vis devers eus. Einsi furent trosque à vespre bas, et li Comain et li Blac se recomencièrent à retraire.
Lors manda Joffrois de Ville-Hardoin, le mareschaus de Champaigne et de Romenie, le duc de Venise en l'ost qui vieus hom ere et goute ne véoit, mais mult ere sages et preus et viguereus; et li manda que il venist à lui en sa bataille, où il se tenoit el champ; et il si fist. Et quant li mareschaus le vit, si l'apele à conseil d'une part tot seul, et si li dist: «Sire, vos véez la mesaventure qui nos est avenue: perdu avons l'empereor Baudoin et le comte Loeys, et le plus de nostre gent, et de la meillor. Or pensons del remanant garir; que se Dieu n'en prent pitiez, nos sommes perdu.» Einsi fu la fins de lor conseil: que li dux de Venise s'en riroit en l'ost, et conforteroit la gent; et que chascuns fust armez de ses armes, et se tenist coi en sa herberge et en son paveillon; et Joffrois li mareschaus remanroit en sa bataille et defors l'ost toz ordenez tant que il seroit nuiz, porce que lor anemi ne les veissent esmovoir; et quant il seroit nuiz, si se movroient de devant la ville; li dux de Venise s'en iroit devant, et Joffrois li mareschaus feroit l'arière garde, et cil qui avec lui estoient.

LXXXIII.

Einsi attendirent trosqu'à la nuit; et quant il fu nuiz, le dux de Venise se parti de l'ost, si com devisé ere, et Joffrois li mareschaus fist l'arière garde. Et s'en partirent le petit pas, et enmenerent tote lor gent à pié et à cheval, et navrez et autres; que onques ne laissierent nului. Et chevauchièrent vers une cité qui siet sor mer, que l'on appelle Rodestoc, qui bien ere trois jornées loing d'iqui. Einsi se partirent d'Andrinople com vos avez oï; et ceste aventure si avint en l'an de l'incarnation Jesu-Crist mil deus cens cinq anz.
Et cele nuit que l'ost se parti d'Andrinople, si avint que une compaignie s'en parti, pour aler plus tost en Constantinople et plus droit; et en reçurent grant blasme. En cele compaignie fu un cuens de Lombardie qui avoit nom li cuens Girarz, de la terre del marquis; et Eudes de Ham, qui sires ert d'un chastel que on apele Ham en Vermandois; et Jehans de Maseroles, et bien autre, trosques à vint cinq chevaliers, que li livres ne raconte mie. Et einsi en vinrent puis la desconfiture qui ot esté le jeudi à soir; si vindrent en Constantinople le samedi à soir; si i avoit cinq jornées granz. Et contèrent ceste novelle le cardinal Pierron de Chappes, qui ere de par l'Apostoile de Rome Innocent, et Conon de Betune qui gardoit Constantinople, et Milon le Braibant, et les autres bones genz. Et sachiez qu'il en furent mult esfreé, et cuidèrent bien que li remananz fust toz perduz, que il avoient devant Andrinople laissié; que il n'en savoient novelle.

LXXXIV.

Or lairons de ceus de Constantinople, qui en grant dolor sont, si reviendrons au duc de Venise et à Joffroi le mareschal, qui chevauchièrent tote la nuit que il repairèrent d'Andrinople trosque à l'ajornée; et lors vinrent à une cité que on apele Panfile. Or oiez des aventures queles eles sunt, si com Dieu volt: qu'en cele cité avoient la nuit geu Pierres de Braiecuel et Paiens d'Orléans, et totes les genz de la terre le comte Loeys; et estoient bien cent chevalier de mult bone gent, et sept vins serjanz à cheval, qui venoient d'outre le Braz, et aloient à l'ost à Andrinople. Et quant il virent la route venir, si corurent as armes mult isnelement; que il cuidoient que ce fussent li Grieu. Si s'armèrent, et envoierent savoir quels genz ce estoient; et cil trovèrent que ce estoient cil qui retornoient de la desconfiture. Si retornèrent à eus, et lor distrent que perduz ert li empereres Baudoins, et lor sires li cuens Loeys, de cui terre et de cui païs il estoient, et de cui maisnie.
Plus doloreuse novele ne lor peust-on conter. Là veissiez mainte lerme plorer, et mainte paume battre de deuil et de pitié. Et alèrent encontre eus tuit armé si com il estoient, et tant que il vinrent à Joffroi le mareschal de Champaigne, qui l'arière garde faisoit à mult grant mesaise. Que Johannis, li rois de Blaquie et de Bougrie, ere venuz à l'ajornée devant Andrinople à tote s'ost, et trova que cil s'en furent alé; et chevaucha après lor route tant qu'il fu grans jors; et quant il ne les trova, si en fu mult dolanz; et ce fu granz joie que il nes i trova; que perdu fussent sanz nul recovrer, se il les eust trovez.
«Sire, font-il à Joffroi le mareschal, que volez que nos facions? Nos ferons quanque il vous plaira.» Et cil lor respont: «Vos véez bien coment il nos est; vos estes frais et novel, et vostre cheval; si ferez l'arière garde, et je m'en irai devant, tenir nostre gent qui sont mult esfreé, qui grant mestier en ont.» Einsi com il le devisa, il le firent mult volentiers. Si firent l'arière garde mult bien et mult bel, com cil qui bien le surent faire; car il estoient bon chevalier et honoré.

LXXXV.

Joffrois li mareschaus de Champaigne chevaucha devant et les conduist; et chevaucha trosques à une cité qui Cariople ert apelée. Si vit que lor cheval estoient lassé de ce que il avoient tote nuit chevauchié; et entra en la cité, et les fist herbergier bien endroit hore de midi. Et donèrent lor chevaus à mengier; et il meismes mengierent ce que il porent trover, et ce fu peu.
Einsi furent tot le jor trosque à la nuit en cele cité. Et Johanis li rois de Blaquie les ot tote jor suivis à tote sa route et se herberja bien deus lieues d'eus. Et quant il fu nuiz, cil qui estoient en la cité si s'armèrent tuit et s'en issirent fors. Joffrois li mareschaus fist l'avant-garde, et cil firent l'arière garde qui le jor l'avoient faite. Einsi chevauchièrent tote nuit à l'endemain à grant dote et à grant paine, tant que il vindrent à la cité de Rodestoc qui ere peuplée de Grecs, mult riche et mult forz. Et cil ne s'osèrent desfendre; et nos gens entrèrent enz, si se herbergièrent; et lors si furent asseur.
Einsi s'eschapèrent cil de l'ost d'Andrinople com vos avez oï. Lors pristent conseil en la cité de Rodestoc, et distrent que il avoient plus grant paor de Constantinople que d'eus meismes. Si pristrent bons messages, et les envoièrent par mer et par jor et par nuit, et mandèrent à ceus de la ville que il ne s'esmaïassent mie, que il estoient eschapé, et que il repaireroient à eus au plus tost que il porroient.

LXXXVI.

En cel point que li message vindrent, estoient cinq nefs chargies de pelerins et de chevaliers et de serjanz en Constantinople (des nefs de Veniciens, mult granz et mult beles), qui vuidoient la terre et s'en aloient en lor païs. Et avoit bien es cinq nefs sept mille homes à armes; et iere Guillaumes li avoez de Betune li uns, et Baudoins d'Aubeigni, et Johans de Virsin, qui ere de la terre le comte Loeys et ses hom liges, et bien cent autre chevalier que li livres ne raconte mie. Maistre Pierres de Chappes, qui ere cardinals de par l'Apostoile de Rome Innocent, et Cuenes de Betune, qui gardoit Constantinople, alèrent as cinq nefs; et lor prioient o plaintes et o plors, que ils eussent merci et pitié de la crestienté et de lor seignors liges, qui estoient perdu en la bataille, et que il demorassent par Dieu. Il n'en vorrent oïr nule parole, ainz s'en partirent del port: si levèrent lor voiles et s'en alèrent, si com Dieu volt, si que uns venz les mena el port de Rodestoc; et ce fu l'endemain que cil i furent venu qui estoient repairié de la desconfiture. Autel prière com cil avoient fait de Constantinople à lermes et à plors, autel prière lor firent cil de Rodestoc; et lor dist Joffrois li mareschaus, et cil qui avec lui estoient, que il eussent merci et pitié de la terre, et que il remansissent; que jamais à si grant besoing ne porroient secorre nulle terre. Icil respondirent qu'il s'en conseilleroient, et qu'il lor respondroient l'endemain.
Or oiez l'aventure qui la nuit avint en cele ville. Il i avoit un chevalier de la terre le comte Loeys, qui Pierres de Frouville avoit nom, qui ere prisiés et de grant nom. Et s'en embla la nuit, et laissa tot son hernois et sa gent, et se mist en la nef Johan de Virsin, qui est en la terre le comte Loeys de Blois et de Chartein. Et cil des cinq nefs qui respondre devoient au matin à Joffroi le mareschal et au duc de Venise, si tost com il virent le jor, si levèrent lor voiles, et s'en alèrent sanz parler à nullui. Mult en reçurent grant blasme en celui païs où il alèrent et en celui dont il partirent, et Pierres de Frouville plus grant que tuit li autre. Et por ce dit on que mult fait mal, qui por paor de mort fait chose qui li est reprovée à toz jorz.

LXXXVII.

Or vos lairons de ceus, si dirons de Henri le frere l'empereor Baudoin de Constantinople, qui avoit l'Andremite guerpie que il avoit conquise, et iert passez à la cité d'Avie et s'en venoit vers Andrinople por l'empereor Baudoin son frere secourre. Et avec lui s'en estoient passé li Hermin de la terre, qui avoient aidié vers les Grieux, bien vint mil à totes lor fames et à toz lor enfanz, qu'il n'osoient remanoir el païs. Et lors li vint la novele, des Grecs qui stoient eschapé de la desconfiture, que ses freres l'empereres Baudoins ere perduz, et li cuens Loeys, et li autre baron. Et puis revint novele de ceus de Rodestoc qui estoient eschapé; et li mandoient que il se hastast plus tost de venir à eus. Et porce que il se volt haster por plus tost venir, si laissa les Hermins, qui estoient genz à pié, et avoient lor chars et lor fames et lor enfanz; et porce que il ne porent si tost venir, et que il cuida que il venissent bien seurement et que il n'eussent garde, si se herberja à un casal qui Cortacople ert apelez.
En icel jor meismes y vint Ansials de Corceles, li niés Joffroi le mareschal, cui il avoit envoié es parties de Macré et de Traïnople et de la Baie, devers une terre qui li estoit otroiée à avoir; et les gens qui estoient parti de Finepople, de Renier de Trit, estoient ensemble o lui. En cele compaignie, avoit bien cent chevaliers de mult bone gent, et bien cinq cens serjanz à cheval, qui tuit s'en aloient à Andrinople por l'empereor Baudoin secore.
Or lor vint une novele autresi com à l'autre gent, que l'empereres ere desconfiz et sa compaignie; et tornèrent autresi com por venir à Rodestoc, et vindrent por herbergier à Cortacople, un casal où Henris li freres l'empereor Baudoins ere herbergiez. Et quant cil les virent venir, si corurent à lor armes, que il cuidèrent que cil fuissent Grieu, et cil recuidèrent autresi d'eus. Et aprocha tant la chose que il s'entreconurent; si virent mult volentiers li uns l'autre, et furent plus seur, et herbergièrent la nuit el casal trosque à l'endemain. Et l'endemain murent et chevauchièrent droit vers Rodestoc, et vinrent le soir en la ville, et trovèrent le duc de Venise et Joffroi le mareschal, et les autres qui de la desconfiture erent eschapé, qui mult volentiers les virent; et i ot mainte lerme plorée de pitié de lor amis. Ha! Dieu, quels damages fu que ceste assemblée de ceste force qui estoit iqui ne fu avec les autres à Andrinople, quant l'empereres Baudoins i fu! quar il n'i eussent riens perdu. Mais ne plot à Dieu.
Einsi sejornèrent l'endemain et l'autre jor après, et atornèrent lor afaire. Et fu receuz Henris li freres l'empereor Baudoin en la seigneurie come bailes de l'empire, en lieu de son frere. Et lors avint une mesaventure des Hermines qui venoient après Henri le frere l'empereor Baudoin: que les gens del païs s'assemblèrent, si desconfirent les Hermines, et furent pris et mort et perdu tuit.

LXXXVIII.

Johans li rois de Blaquie et de Bougrie fu à totes ses oz et ot tote porprise la terre; et li païs et les citez et li chastel se tenoient à lui; et ses Commain orent coru trosque devant Constantinople. Henris li bailes de l'empire, et li dux de Venise et Joffrois li mareschaus, erent encor en Rodestoc, qui ere à trois jornées loing de Constantinople. Et pristrent lor conseil; et garni li dux de Venise Rodestoc de Veniciens, qu'il ere leur. Et l'endemain ordenèrent lor batailles, et chevauchèrent vers Constantinople par lor jornées. Et quant il vindrent à Salembrie, une cité qui ere à deus jornées de Constantinople qui ere l'empereor Baudoin, Henris ses freres la garni de sa gent; et chevauchèrent au remanant trosque en Constantinople, où il furent mult volentiers veu, que la gens del païs erent mult esfreé. Et n'ere mie de merveille, que il avoient la terre si tote perdue, que il ne tenoient, defors Constantinople, fors que Rodestoc et Salembrie; et tote la terre si tenoit Johans li rois de Blaqui et de Bougrie. D'autre part le Bras de Saint-George, ne tenoient que le cors de l'Espigal; et tote la terre si tenoit Théodore Lascaris.
Lors pristrent li baron un conseil, que il envoieroient à l'Apostoile de Rome Innocent, et en France et en Flandres, et par les autres terres, por querre secors. Por ce secors fu envoiez Neveles li evesques de Soissons, et Nicholes de Mailli, et Johans Bliaus; et li autre remestrent en Constantinople à grant mesaise, com cil qui cremoient perdre la terre. Einsi furent trosque à la Pentecoste. Dedenz cel sejor, avint un mult granz domages en l'ost: que Henris Dandole prist une maladie; si fina et moru, et fu enterrez à grant honor au mostier Sainte-Sophie.
Et quant vint la Pentecoste, Johans li rois de Blaquie et de Bougrie ot fait mult de sa volenté en la terre; si ne pot plus ses Comainz tenir en la terre, que il ne porent plus soufrir l'ostoier por l'esté, ainz repairièrent en lor païs. Et il, à tote s'ost de Bogres et de Grifons, s'en ala sur le marquis vers Salonique. Et li marquis qui ot oï noveles de la desconfiture l'empereor Baudoin, guerpi le siège de Naples; si s'en ala à Salonique, à tant com il pot avoir de gent, si la garni.

LXXXIX.

Henris li freres l'empereor Baudoin de Constantinople, à tant de gent com il mener pot, chevaucha sur les Grieus trosque à une cité que on apele le Churlot, qui est à trois jornées de Constantinople. Cele li fu rendue; et li jurèrent li Grieu la fealté, qui mauvaisement ere tenue à cel temps. Et chevaucha à la cité d'Archadiople, si la trova vuide, que li Grieu ne l'i osèrent atendre. Et d'iqui chevaucha à la cité de Visoi, qui mult ere forz et bien garnie de Grieus; si li fu rendue. Et d'iqui chevaucha à la cté de Naples, qui mult restoit bien garnie de Grieus. Com il les voldrent assaillir, si quisent plait qu'il se rendoient. Endementiers que il queroient plait d'une part, cil de l'ost entroient de l'autre part en la cité, si que Henris li bailes de l'empire, et cil qui parloient del plait, n'en sorent mot; ainz lor en pesa mult. Et li Franc commencent à ocire les Grieus, et à gaigner les avoirs de la ville, et à prendre tot; se en i ot mult de morz et de pris. Et en ceste manière fu prise Naples; et enqui sejorna l'ost par trois jors. Et li Grieu furent si esfreé de ceste occision, que il vuidèrent totes les citez et les chastiaus de la terre, et furent tuit dedenz Andrinople et dedenz le Dimot, qui mult erent forz citez et bones.

XC.

En icel termine, avint que Johannis, li rois de Blaqui et de Bougrie, chevaucha sor le marquis à totes ses oz, à une cité que on appelle la Serre. Et li marquis l'avoit mult bien garnie de sa gent, qu'il avoit mis dedenz Hugon de Colemi, qui mult ere bons chevaliers et haus hom, et Guillaume d'Arle qui ert ses mareschals, et grant part de sa bone gent. Et Johannis li rois de Blaquie les assist; n'i ot gaires sis quant il ot pris le bourg par force. Et au bourg prendre, lor avint mult granz domages: que Hugues de Colemi i fu morz, si fu feruz parmi l'œil. Et quant cil fu morz, qui fu li mieudres s'eus toz, si furent li autre mult effreé. Si se traistrent el chastel, qui mult ere forz; et Johannis les assist, et dreça ses pierières et ses mangonniaus. N'y sist mie longuement, quant cil de dedenz parlèrent de plait faire; dont il furent blasmé, et reprochié lor fu. Et li plais si fu tels que il rendirent le chastel à Johannis; et Johannis lor fist jurer à vingt-cinq des plus haus homes que il avoit, que il les conduiroit salvement, à toz lor chevaus et à totes lor armes et à tot lor harnois, à Salonique ou en Constantinople ou en Hongrie, lequel que il voldroient des trois.
En ceste manière fu rendue la Serre; et Johannis les fist issir fors, et logier lez lui as champs; et lor fist mult bel semblant, et lor envoia ses presenz. Et si les tint par trois jors, puis lor menti de quanque il lor ot convent; ainz les fist prendre, et tolir tot lor avoir, et mener en Blaquie, nuz et deschauz et à pié. Les povres et les menus qui ne valoient gaires, fist mener en Hongrie, et les autres qui auques valoient, fist les testes couper. Einsi mortel traïson fist li rois de Blaqui com vos oez. Ici reçut l'ost une des plus doloreuses pertes que onques feist. Et Johannis fist abatre le chastel et la cité, et s'en rala vers le marquis.

XCI.

Henris, li bailes de l'empire, à tote la soe gent chevaucha vers Andrinople, si l'asist à mult grant peril, que il avoit mult grant gent dedenz et deforz, qui les tenoient si près que il ne povoient nul marchié avoir, ne forer, se peu non. Et lors si se closent par defors de lices et de barres; et devisèrent une partie de lor gent porce que il gardassent par defors lor lices et lor barres; et li autre assaudroient devers la ville. Et firent engins de maintes manières, et eschieles et mains autres engins; et mistrent grant paine à la ville prendre, mais ne pot estre, que la ville ere mult forz et mult bien garnie. Ainz lor mesavint, que de lor gent i ot bleciez assez; et uns de lor bons chevaliers qui ot nom Pierres de Braiecuel, fu feruz d'une pierre de mangonel au front, et dut estre morz, mais il gari par la volenté de Dieu, et en fu portez en litière. Et quant il virent que il ne porroient rien faire à la ville, si s'en parti Henris li bailes de l'empire et l'ost des François. Et furent mult hardoié de la gent de la terre et des Grecs; et chevauchièrent par lor jornées trosque à une cité que on apele la Panphile, et se herbergièrent dedenz, et sejornerent par deus mois iqui. Et firent chevauchiées vers le Dimot, et en mains lieus où il gaaignèrent assez proies et autres avoirs. Et tindrent l'ost en icele partie trosque à l'entrée de l'iver; et lor venoit marcheandise de Rodestoc et de la marine.

XCII.

Or lairons ici de Henri le baile de l'empire, si dirons de Johannis le roi de Blaquie et de Bougrie, cui la Serre fu rendue, si com vos l'avez oï retraire arrière, et qui ot ocis ceus en traïson qui s'erent rendu à lui. Et ot chevauchié vers Salonique, et ot sejorné longuement, et gasté grant partie de la terre. Li marquis Bonifaces de Monferrat fu à Salonique mult iriez et mult dolenz de son seignor l'empereor Baudoin qui perduz ere, et des autres barons, et de son chastel de la Serre, et de ses homes.
Et quant Johannis vit qu'il n'i porroit plus faire, si retorna arrière vers son païs à tote sa gent. Et cil de Phinepople (qui ere à Renier de Trit, cui l'empereres Baudoins l'ot donée) orent oï que l'empereres Baudoins ere perduz et mult des barons, et li marquis la Serre avoit perdue; et virent que li parent Renier de Trit, et ses fils et ses niés l'avoient guerpi, et que li ert à peu de gent; et cuidèrent que jamais li Franc n'eussent force. Une granz partie des gens, qui estoient Popelican, s'en alèrent à Johannis, et se rendirent à lui, et li distrent: «Sire, chevauche devant Phinepople ou envoie t'ost; nos te rendrons la ville tote.»
Quant Renier de Trit le sot qui estoit en la ville, si douta que il ne le rendissent à Johannis. Einsi que s'en issi à tant de gent com il ot, et s'esmut à une ajornée, et vint par un des bourgs de la ville où li Popelican erent à estage, qui erent rendu à Johannis; si mist le feu au bourg, et en art grant part. Et s'en ala au chastel d'Estanemac, qui ere à trois lieues d'iqui et ere garniz de sa gent, et entra dedenz. Et i fu puis longuement enserrez, bien treize mois, à grant mesaise et à grant poverté; et menja ses chevaus par destresce. Et ere neuf jornées de Constantinople loing, que il ne povoient noveles oïr li uns des autres.
Lors envoia Johannis s'ost devant Phinepople; n'y sist mie longuement quant cil de la ville se rendirent à lui, et il les asseura. Et quant il les ot asseurez, si fist occire tot avant l'archevesque de la ville, et les hauz homes fist escorchier toz viz, et tels i ot ardoir et tels i ot les testes colper; et tot le remanant en fist mener en chaîne. Et la ville fist tote fondre et les tors et les murs, et les hauz palais et les riches maisons ardoir et fondre. Einsi fu destruite la noble citez de Phinepople, qui ere des trois meillors de l'empire de Constantinople.

XCIII.

Or lairons de Phinepople et de Renier de Trit, qui ert enserrez el chastel d'Estanemac; si reviendrons à Henri, le frere l'empereor Baudoin, qui ot sejorné à Pamphile trosque à l'entrée de l'iver. Et lors prist conseil à ses homes et à ses barons; et li conseils si fu tels, que il garniroit une cité que on apele la Rousse, qui ere en un mult plantureus lieu, enmi la terre. Et de cele garnison fu chevetaines Thierris de Los qui ere seneschaus, et Thieris de Tendremonde qui ere conestables. Et lor charja bien Henri li bals de l'empire sept vins chevaliers, et grant part de serjanz à cheval; et comanda que il tenissent la guerre contre les Grecs et maintenissent la marche. Et il s'en ala au remanant de sa gent trosque à la cité de Visoi, et la garni; et mist chevetaine Ansel de Kaeu, et li charja bien six vins chevaliers, et serjanz à cheval grant partie. Et une autre cité, qui Archadiople ert apelée, garnirent li Venicien. Et la cité de Naples ot rendue li freres l'empereor Baudoin au Vernas, qui avoit la seror au roi de France à fame, et ere uns Grieus qui se tenoit à eus; et nuls des Grieus ne se tenoit à eus que cil. Et cil de ces citez tindrent la guerre contre les Grieus, et si firent mainte chevauchiée; et on en fist mainte envers eus. Henris se traist en Constantinople au remanant de sa gent.
Et Johannis li rois de Blaquie et de Bougrie ne s'oblia mie, qui mult fu riches et poesteis d'avoir; ainz porchaça grant gent de Commains et de Blaques. Et quant vint à trois semaines après Noël, si les envoia en la terre de Romenie, por aidier ceus d'Andrinople et ceus del Dimot; et quant cil furent plus creu, si s'esbaudirent et chevauchièrent plus seurement.

XCIV.

Thierris de Tendremonde, qui chevetaines ere et conestables, fist une chevauchiée au quart jor devant la feste sainte Marie Chandelor; et chevaucha tote nuit bien à six vins chevaliers, et la Rousse laissa garnie à peu de gent. Et quant vint à l'enjornée, si vint à un casal où Commain et Blac estoient herbergié; et les sorpristrent, si que il n'en sorent mot qui estoient el casal. S'en ocistrent assez, et gaignerent bien quarante de lor chevaus; et quant il orent fait cel forfait, si tornèrent arrière vers la Rousse.
En cele nuit meismes, li Commain et li Blac orent chevauchié por forfaire; et furent bien sept mil. Et vindrent à la matinée devant la Rousse, et i furent grant pièce; et la ville ere garnie de peu de gent. Si fermèrent lor portes, et montèrent sur les murs; et cil s'en tornèrent arrière. N'orent mie eslongié la ville plus d'une lieue et demie, quant il encontrèrent la chevauchiée des François dont Thierris de Tendremonde ere chevetaines. Quant li François les virent, si s'ordenèrent en quatre batailles qu'il avoient. Et fu lor conseils tels que il se trairoient à la Rousse tot le petit pas; et se Dieu lor donoit que il i peussent venir, il seroient à sauveté. Et li Commain et li Blac et li Grieu de la terre chevauchièrent vers eus; quar il avoient mult grant gent. Et vienent à l'arière garde; si les comencent à hardoier mult durement. L'arière garde faisoit la maisnie Thierri de Los, qui ere seneschaus et estoit repairiez en Constantinople; et de cele gens ere chevetaines Vilains ses freres. Et li Commain et li Blac et li Grieu les tindrent mult près, et navrèrent mult de lor chevaus. Et fu li huz et la noise granz, si que par vive force et par destrece les fisent heurter sur la bataille Andriu d'Urboise et Johan de Choisi; et einsi alèrent sofrant grant pièce. Et puis se resforcièrent, si que il les fisent heurter sur la bataille Thierri de Tendremonde le conestable. Et ne tarda gaire grantement après qu'il les fisent heurter sor les batailles que Charles del Fraisnes faisoit. Et orent tant alé sofrant, que il virent la Rousse à moins de demie lieue. Et cil adès les tindrent plus près; et fu la noise granz sur eus, et mult i ot de bleciez d'eus et de lor chevaus. Et si com Dieu volt souffrir les aventures, cil ne le porent plus soufrir, ainz furent desconfit; car il furent pesament armé, et lor anemi legièrement; et les comencent à occirre.
Halas! com doloreus jor ci ot à la crestienté, que de toz les six vins chevaliers, n'en eschapèrent mie plus de dix que tuit ne fussent mort ou pris. Et cil qui en eschapèrent s'en vindrent fuiant à la Rousse, et se recoillirent avec lor genz qui là dedenz estoient. Là fu morz Thierris de Tendremonde li conestables, Oris de l'Isle, qui mult erre bons chevaliers et prisiez, et Johans de Pompone, Andrius d'Urboise, Johans de Choisi, Guis de Covlans, Charles de Fraisne, Vilains li freres Thierri le seneschal. De toz ceus qui là furent mort ou pris ne vos puet toz les noms raconter li livres. Une des graignors dolors et des graignors domages avint à cel jor, et des graignors pitiez qui onques avenist à la crestienté de la terre de Romenie.
Li Commain et li Grieu et li Blac retornerent arière, qui mult orent fait lor volenté en la terre, et mult gaigné de bons chevaus et de bons haubers. Et ceste mesaventure si avint le jor devant la veille madame sainte Marie Chandelor. Et li remananz qui fu eschapez de la desconfiture, et cil qui estoient à la Rousse, si tost com il fu nuiz, si guerpirent la ville; et s'en alèrent tote nuit fuiant, et vindrent au matin à la cité de Rodestoc.

XCV.

Iceste doloreuse novele si vint à Henri le baile de l'empire, si com il aloit à la procession à Nostre-Dame de Blaquerne, le jor de la feste madame sainte Marie Chandelor. Sachiez que mult furent effreé en Constantinople, et cuidèrent por voir qu'il eussent la terre perdue. Lors prist conseil Henris li bailes de l'empire que il garniroit Salembrie, qui ere à deus jornées de Constantinople; et i envoia Machaire de Sainte Manehault atot cinquante chevaliers por garder la ville. Et lors, quant la novele vint à Johannis le roi de Blaquie que ce ere à sa gent avenu, si ot mult grant joie, que ce ere une granz partie de la bone gent que li François eussent, que il avoient morz et pris. Lors manda par tote sa terre quanque il pot avoir de gent, et porchaça grant ost de Comains et de Grieus et de Blacs, et entra en Romanie. Et li plus des citez se tindrent à lui, et tuit li chastel; et ot si grant gent que ce ne fu se merveille non.
Quant li Venicien oïrent dire que il venoit à si grant gent, si guerpirent Archadiople. Et Johannis chevaucha à totes ses oz tant que il vint à la cité de Naples, qui ere garnie de Grieus et de Latins, et ere le Vernas, qui l'empereris, la seror le roi de France, avoit à fame; et des Latins ere chevetaines Begues de Fransures, uns chevaliers de la terre de Beauvaisis. Et Johannis li rois de Blaquie fist assaillir la cité et la prist par la force. Là ot si grant mortalité de gent qui furent occis, que ce ne fu se merveille non. Et Begues de Fransures fu amenez devant Johannis, et il le fist occirre maintenant et toz les autres qui neient valurent des Grecs et des Latins; et totes les menues gens, fames et enfanz, en fist mener en Blaquie en prison. Lors la cité fist fondre et abatre, qui ere mult bone et mult riche, et en bon païs. Einsi fu destruite la citez de Naples com vos avez oï.

XCVI.

D'iqui après à doze lieues, séoit la cité de Rodestoc sor mer, qui mult ere riche et forz et granz, et garnie de Veniciens mult bien. Et avec tot ce, ere venue une route de serjanz à cheval; et estoient bien dui mil, et erent venu autresi à la cité por garnir. Quant il oïrent dire que Naples estoit prise par force, et que Johannis avoit fait occirre les genz qui estoient dedenz, si se mist uns si grant effroiz en eus que il se desconfisent par eus meismes. Si com Dieu souffre les mesaventures avenir as genz, li Venicien se ferirent es vaissiaus, qui ainz ainz, qui mieuz mieuz; si que por peu que li uns ne noyoit l'autre. Et li serjant à cheval, qui estoient de France et de Flandre et des autres terres, s'enfuioient par terre. Or oiez quele mesaventure ce fu, qui ne lor ere mestiers; quar la citez ere si forz et si close de bons murs et de bones tors, que il ne trovassent jà qui les assaillist, ne Johannis ne tornast jà cele part. Et quant Johannis oï dire que il s'en estoient fui, qui ere bien à demie jornée loing de qui, chevaucha cele part. Li Grieu qui estoient en la cité remés se rendirent à lui, et il maintenant les fist prendre, et petiz et granz, fors ceus qui en eschapèrent, et les fist mener en Blaquie; et fist la cité fondre et abatre. Ha! com ce fu granz domages; car ce ere une des meillors citez de Romenie, et des mieuz seanz.

XCVII.

Après d'iqui en avoit une autre qui Panedor ert appelée, qui se rendi à lui; et il la fist abatre et fondre, et les genz fist mener en Blaquie ausi com de celi. Et après chevaucha à la cité d'Héraclée, qui séoit sor un bon port de mer, et ere as Veniciens, qui l'avoient feblement garnie; si l'assailli et la prist par force. Enqui ot grant occision de gent; et le remanant le fist mener en Blaquie, et fist fondre la cité com les autres. Et d'iqui chevaucha à la cité de Daïn, qui ere mult forz et bele; et la gent ne l'osèrent tenir; si li fu rendue, et il la fist fondre et abatre. Après chevaucha à la cité del Churlot, qui s'ere à lui rendue; et il la fist fondre et abatre, et mener les gens en prison. Et einsi com aucuns chastiaus ou aucune citez se rendoit à lui, et il les avoit asseurez, il les fesoit abattre, et mener les homes et les fames en prison; et nulle convenance que il lor fist ne lor tenoit. Lors corrurent li Commain et li Blac devant les portes de Constantinople, où Henris li bailes de l'empire ere à tant de gent com il avoir povoit, mult dolenz et iriez por ce que il ne povoit avoir tant de gent qu'il peust sa terre desfendre. Et einsi pristrent li Commain les proies de la terre, et homes et fames et enfanz, et abatirent les citez et les chastiaus, et fisent si grant essil que onques nus hom n'oï parler de si grant. Lors vindrent à une cité à douze lieues de Constantinople, qui Nature ert apelée; et Henris li freres l'empereor l'avoit donnée à Payen d'Orléans. En cele cité avoit mult grant peuple de gent, car cil del païs i estoient tuit afui; et il l'assaillirent, si la pristrent par force. Là i ot si grant occision de gent, que il n'avoit eu si grant en nule ville où il eussent esté. Et sachiez que tuit li chastel et totes les cités qui s'erent rendu à Johannis, et cui il avoit asseurez, erent tuit fondu et destruit, et menées les gens en Blaquie, en tel maniere com vos avez oï.
Sachiez que dedenz cinc jornées de Constantinople ne remest nule riens à essillier, fors seulement la cité de Visoi et cele de Salembrie, qui estoient garnies de François. Et en cele de Visoi ere Ansiaus de Kaeu, bien atot six vins chevaliers; et en cele de Salembrie ere Machaires de Sainte Manehault atot cinquante; et Henris li freres l'empereor Baudoin ere remés en Constantinople au remanant. Et sachiez que mult erent au desouz, que defors le cors de Constantinople n'avoient retenu que ces deus citez.

XCVIII.

Quant ce virent li Grieu qui erent en l'ost avec Johannis, qui s'erent à lui rendu et revellé contre les Francs, et il lor abatoit lor chastiaus et lor citez, et nul convent ne lor tenoit, si se tindrent à morz et à traïs. Et parlèrent ensemble, et distrent que aussi feroit-il d'Andrinople et del Dimot quant il repaireroit; et se il ces deus abatoit, dont estoit Romenie perdue à tozjorz. Et pristrent lor messages privéement, si les envoièrent en Constantinople au Vernas. Et li prioient que il criast merci à Henri le frere l'empereor Baudoin et as Veniciens, que il feissent pais à eus, et que il li donassent Andrinople et le Dimot; et li Grieu se torneroient tuit à lui, et einsi porroient bien estre li Grieu et li Franc ensemble. Conseils en fu pris où i ot paroles de maintes manières; mais la fins del conseil fu tele que au Vernas et à l'empereris sa fame, qui ere sœur le roi Phelippe de France, fu otroïe Andrinople et li Dimos, o totes lor apartenances, et il en feroit le service à l'empereor et à l'empire. Einsi fu la convenance faite et assovie, et la paix faite des Grecs et des Francs.
Johanis li rois de Blaquie et de Bougrie, qui ot sejorné longuement en Romenie, et lou païs gasté trestote le quaresme et après la Pasque grant pièce, si s'en retraist arière vers Andrinople et vers le Dimot, et ot en pensé que il en feroit tot autretel com il avoit fait des autres. Et quant li Grieu virent ce, qui estoient avec lui, qu'il torneroit vers Andrinople, si se comencièrent à embler de lui, et par nuit et par jor, vint, trente, quarante, cent. Et quant il vint là, si lor requist que il le laissassent ausi entrer dedenz, com il avoient fait dedenz les autres. Et il li distrent que il ne feroient, et distrent: «Sire, quant nos nos rendimes à toi, et nos nos revelames contre les Francs, tu nos juras que tu nos garderoies en bone foi et sauveroies. Tu ne l'as pas fait, ains as destruite Romenie; et ausi savons nos bien que tu nos feroies ausi com tu as fait des autres.» Et quant Johannis oït ce, si asist le Dimot, et dreça entor seize pierières granz; et comença engins à faire de mainte manière, et à gaster tot le païs entor.
Lors pristrent cil d'Andrinople et cil del Dimot lor messages; si les envoièrent en Constantinople à Henri, qui ere bailes de l'empire, et au Vernas, que il secorussent port Dieu le Dimot qui ert assis. Et quant cil de Constantinople oïrent la novele, si pristrent conseil del Dimot secoure. Mult i ot de ceus qui n'osèrent loer que on issist de Constantinople, ne que on si peu que on avoit de la crestienté meist en aventure. Totes voies fut lor conseils tels que il istroient fors, et que il iroient trosque à Salembrie; et enqui fu logiez devant la ville bien par huit jorz. Et de jor en jor li venoient message d'Andrinople, et li mandoient que eust merci d'eus, et que il les secorust; que se il ne les secoroit il estoient perdu enfin.

XCIX.

Lors prist conseil Henris à ses barons, et li conseils si fu tels que il alassent à la cité de Visoi, qui mult ere bone et forz. Einsi com il disent si le fisent; et vindrent à la cité de Visoi, si se logièrent devant la ville le jor de la veille de la feste monseignor saint Johan Baptiste en juing. Et le jor com il furent logié, vindrent li message d'Andrinople, et distrent à Henri le frere l'empereor Baudoin: «Sire, sache que se tu ne secors la cité del Dimot, que ele ne se puet tenir plus de huit jors; car les pierières Johannis ont abattu le mur en quatre lieus, et ont esté ses gens deus foiz sur les murs.»
Lors demanda conseil que il feroit. Assez i ot parlé avant et arière, mais la fins del conseil si fu tels que il distrent: «Seignor, nos somes jà tant venu avant, que nos somes honi se nos ne secorons le Dimot. Mais soit chascuns confès et commeniez, et ordenons noz batailles.» Et aesmèrent que il avoient bien quatre cenz chevaliers, et que il n'en avoient mie plus; et mandèrent les messages qui erent venu d'Andrinople, et demandèrent le convine, combien Johanis avoit de gent. Et il respondirent que il avoit bien quarante mil homes à armes, sanz ceus à pié dont il ne savoient le conte.
Ha! Dieu, com perilleuse bataille de si peu de gent encontre tant! Au matin, le jor de la feste monseignor saint Johan Baptiste, furent tuit confès et commenié, et l'endemain si murent. L'avangarde si fu commandée à Joffroi le mareschal de Romenie et de Champaigne, et Machaires de Sainte-Manehault fu avec. La seconde bataille fist Coenes de Betune et Miles li Brabanz; la tierce, Paiens d'Orléans et Pierres de Braiecuel; la quarte, Ansials de Kaeu; la quinte, Baudoins de Belveoir; la siste, Hues de Belmés; la septisme, Henris li freres l'empereor Baudoin; l'uitisme, Gautiers de Escornai et li Flamenc. Thierris de Los, qui ere seneschaus, fist l'arière garde.
Lors chevauchièrent tot ordenéement par trois jors; ne onques plus perilleusement genz n'alèrent querre bataille. Car il avoient deus perils: de ce que il estoient peu, et cil estoient assez à cui il aloient combatre; d'autre part, il ne créoient pas les Grieus, à cui il avoient paix faite, que il lor dussent aidier de cuer. Ainz avoient paor que quant vendroit au besoing, que il ne se tornassent devers Johanis, qui avoit le Dimot si aprochié de prendre, com vos avez oï arière.

C.

Quant Johannis oï que li Franc venoient, si nes osa attendre; ainz arst ses engins, et se desloja. Et einsi se parti del Dimot; et sachiez que toz li monz le tint à grant miracle. Et Henris li bailes de l'empire vint au quart jor devant Andrinople, et se loja sur les plus bels prez del monde, sor la riviere d'Andrinople. Quant cil d'Andrinople les virent venir, si issirent fors à totes lor croiz et à la procession, et fisent la greignor joie qui onques fust veue. Et il le durent bien faire, que il n'estoient mie bien à aise. Et lors vint la novele en l'ost des Francs que Johannis ere logiez à un chastel qui a nom Rodestuic. Et au matin mut l'ost des Francs, et chevaucha vers cele part por la bataille querre; et Johannis se desloja, si chevaucha arière vers son païs. Einsi le suirent par cinc jornées, et il adès s'en ala devant eus. Lors se herbergièrent au cinquisme jor sur un bel lieu, à un chastel que on apele le Fraim; enqui sejornèrent par trois jors.
Et lors s'en parti une compaignie de la bone gent de l'ost, par descorde qu'il eurent à Henri le frere de l'empereor Baudoin. De cele compaignie fu chevetaines Baudoins de Belveoir; et Hues de Belmés fu avec lui, et Guillaumes de Gomeignies, et Drues de Belraim. Et en alerent bien ensemble en cele route cinquante chevalier; et cuidèrent que li remananz n'osast remanoir el païs entre lor anemis.

CI.

Lors pristrent conseil Henris li bailes de l'empire, et li baron qui avec lui estoient; et fu tels lor conseils que il chevaucheroient avant. Si chevauchièrent par deus jors, et se herbergièrent en une mult bele vallée, près d'un chastel que on apele Moniac. Et cil chastiaus lor fu renduz, et y sejornèrent bien par cinq jors, et distrent que il iroient Renier de Trit secore, qui ere dedenz l'Estanemac assis, et i avoit esté bien treize mois enserrez dedenz. Einsi remest Henris li bailes de l'empire en l'ost, et granz partie de sa gent; li remananz ala secore Renier de Trit à l'Estanemac.
Et sachiez que mult alèrent perilleusement cil qui y alèrent, que on a peu veu de si perilleuse rescousse; et chevauchièrent trois jors parmi la terre à lor anemis. En cele rescosse ala Coenes de Betune, et Joffrois de Vile-Hardoin li mareschaus de Romenie et de Champaigne, et Machaires de Sainte-Manehault, et Miles li Braibanz, et Pierres de Braiecuel, et Païens d'Orléans, et Ansials de Kaeu, et Thierris de Los, et Guillaumes del Perçoi, et une bataille de Veniciens, dont Andrius Valere ere chevetaines. Et einsi chevauchièrent trosque au chastel d'Estanemac, et aprochièrent tant que il virent l'Estanemac.
Reniers de Trit ere as bailes des murs, et choisi l'avangarde que Joffrois li mareschaus faisoit, et les autres batailles qui venoient après mult ordenéement; et lors ne sot quels genz ce estoient. Et ce ne fu mie merveille se il dota, que grant temps avoit que il n'avoit oï noveles d'eus; et cuida que ce fussent li Grieu qui les venissent asseoir. Joffrois li mareschaus de Romenie et de Champaigne prist Turcoples et arbalestiers à cheval, si les envoia avant por savoir le convine del chastel, que il ne savoient se il estoient mort ou vif, que grant temps avoit que il n'en avoient oï noveles. Et quant cil vindrent devant le chastel, Reniers de Trit et sa mesnie les conurent: bien le povez savoir que il orent grant joie. Lors s'en issirent et alèrent contre lor amis, si firent grant joie li un as autres.
Et lors se herbergièrent li baron en une mult bone vile qui estoit au pié del chastel, et qui tenoit adès assiegé le chastel. Lors distrent li baron que il avoient maintes foiz oï dire que l'empereres Baudoins ere morz en la prison Johannis, mais il nel créoient mie; et Reniers de Trit dist que por voir ere morz, et il le crurent. Mult i ot de ceus qui en furent dolent; se il le peussent amender! Et einsi jurent la nuit en la ville; et au matin s'en partirent, et guerpirent l'Estanemac. Et chevauchièrent par deus jorz; et au tierz jor vindrent à l'ost où Henris, li freres l'empereor, les atendoit souz le chastel de Moniac, qui siet sor le flum d'Arte, où il estoit herbergiez. Mult fu granz joie à ceus de l'ost de Renier de Trit qui ere rescous de prison, et à bien fu atorné à ceus qui l'en amenèrent; car il y alèrent mult perilleusement.

CII.

Lors pristrent conseil li baron que il iroient en Constantinople, et que il coroneroient Henri le frere l'empereor Baudoin; et laissièrent au païs le Vernas à toz les Grecs de la terre, et atot quarante chevaliers que Henris li bailes de l'empire li laissa. Et einsi s'en ala Henris li bailes de l'empire, et li autre baron, en Constantinople; et chevauchièrent par lor jornées tant que il vindrent en Constantinople, où il furent mult volentiers veu. Lors coronèrent à empereor Henri, le frere l'empereor Baudoin, le dimenche après la feste madame sainte Marie en aoust, à grant joie et grant honor, à l'église Sainte Sophie; et ce fu en l'an de l'incarnation Nostre Seignor Jesu-Crist mil deus cens anz et six.
Et com li empereres fu coronez en Constantinople, si com vos avez oï, et li Vernas fu remés en la terre d'Andrinople et del Dimot, Johannis, rois de Blaquie et de Bougrie, quant il le sot, si amassa de gent quant que il pot. Et li Vernas n'ot mie refermé del Dimot ce que Johanis en ot abatu à ses pierières et à ses mangoniaus, et l'ot povrement garni. Et Johannis chevaucha au Dimot, si le prist et l'abati, et fondi les murs trosque en terre; et cort par tot le païs, et prent homes et fames, et enfanz et proies; et fist granz destruiement. Lors mandèrent cil d'Andrinople l'empereor Henri que il les secorust, que li Dimos ere perduz en tel manière.
Lors semonst l'empereres Henris quanque il pot avoir de gent, et issi de Constantinople, et chevaucha vers Andrinople par ses jornées à toutes ses batailles ordenées. Et Johannis li rois de Blaquie qui ere en la terre, com il oï que il venoit, si se traist arières vers la soe terre. Et l'empereres Henris chevaucha tant que il vint à Andrinople, et se loja defors en la praerie. Et lors vinrent li Grieu del païs, si li distrent que Johannis, li rois de Blaquie, enmenoit les homes et les fames et les proies, et avoit le Dimot destruit et tot le païs entor, et que il ere ancore à une jornée d'iqui. Et li conseils l'empereor fu tels que il s'iroit à lui combatre, se il l'atendoit, por secoure les chaitis et les chaitives que il enmenoit. Et chevaucha après lui (et cil s'en ala devant adès), et le suivi par quatre jorz.
Lors vint à une cité que on apeloit Veroi. Com cil de la cité virent l'ost de l'empereor Henri venir, si s'enfuirent es montagnes et guerpirent la cité. Et l'empereres vint à tote s'ost, et se loja devant la vile, et la trova garnie de blez et de viandes et d'autres biens. Einsi sejorna iqui par deus jours, et fist ses gens corre par le païs entor; et gaaingnèrent assez proies de beufs et de vaches et de bufles, et autres bestes à mult grant plenté. Lors se parti de cele cité à toz ses gaains; et chevaucha à une autre cité, loing d'iqui à une jornée, que on apele Blisme. Et einsi com li autre Grec avoient laissié l'autre cité, ravoient cil laissié cesti; et il la trova garnie de toz biens, et se herberja devant.

CIII.

Lors lor vint une novele que, à une valée à trois lieues de l'ost, estoient li chaitif et li chaitives que Johannis enmenoit, atot lor proies et à toz lor schars. Lors atorna l'empereres Henris que li Grieu d'Andrinople et cil del Dimot les iroient querre, et leur chargeroit deus batailles de chevaliers. Einsi com il fut devisé, si fu fait à l'endemain. De l'une bataille fu chevetaines Eustaices, li freres l'empereor Henri de Constantinople, et de l'autre Machaires de Sainte-Manehault. Et chevauchièrent, entr'eus et les Grieus, trosque en la valée que on lor ot enseigniée; et trovèrent la gent einsi com l'on lor ot dit. Et la gens Johannis assembla à la gent l'empereor Henri; si i ot navrez et morz homes et chevaus de l'une part et de l'autre; mais par la vertu de Dieu, orent li Franc la force; et tornèrent les chaitis, et enmenèrent devant eus arière.
Et sachiez que cele rescousse ne fu mie petite; que bien i ot vint mil que homes que fames que enfanz, et bien trois mil chars chargiez de lor robes et de lor hernois, sans les autres proies dont il avoit assez. Et bien duroit la route, si com il venoient à l'ost, deus lieues granz; et einsi vindrent à l'ost la nuit. Et en fu mult liez l'empereres Henris, et tuit li autre baron; et les fist herbergier d'une part et bien garder, si que onc ne perdirent vaillant un denier de rien qu'y eussent.
L'endemain sejorna l'empereres Henris por le pueple que il ot rescous, et chascuns s'en alla là où il volt, en la terre dont il ere nez ou d'autre part. Et les autres proies, dont il avoit mult grant plenté, furent departies à ceus de l'ost si com il dut. Lors sejorna l'empereres Henri par cinq jorz, et puis chevaucha trosque à la cité del Dimot, por savoir coment ele ere abatue, et se on la porroit refermer. Et se loja devant la vile, et vit, et il et si baron, que il n'estoit mie lieus de la fermer en tel point.

CIV.

Lors vint en l'ost uns bers le marquis Boniface de Monferrat en message, qui Othes de la Roche avoit nom; et parla d'un mariage qui devant avoit esté porparlez, de la fille Boniface le marquis de Monferrat et de l'empereor Henri. Et aporta les noveles que la dame ere venue de Lombardie, et que ses peres l'y avoit envoié querre, et qu'elle ert à Salonique. Lors prist li empereres conseil, et la somme dou conseil si fu tele que li mariages fu asseurez d'une part et d'autre. Einsi s'en rala li messages Othes de la Roche à Salonique.
Et l'empereres ot assemblées ses genz qui orent à garison menz lor gaainz de Veroi, qu'il avoient fait en l'ost. Et chevaucha pardevant Andrinople par ses jornées, tant que il vint en la terre Johanis le roi de Blaquie et de Bougrie. Et vinrent à une cité qu'on apeloit la Ferme; et la pristrent, et entrèrent enz, et i firent mult grant gaain. Et sejornèrent enz par trois jorz, et corurent par tot le païs, et gaaignierent grans gaains, et destruistent une cité qui avoit nom l'Aquile. Au quart jor, se partirent de la Ferme, qui mult ere bele et bien seanz; et i sordoient li baing chaut li plus bel de tot le monde; et la fist l'empereres destruire et ardoir; et enmenèrent les gaains mult granz de proies et d'autres avoirs. Et chevauchièrent par lor jornées tant que il vindrent à la cité d'Andrinople, et sejornèrent el païs trosque à la feste Toz Sains, que il ne porent plus guerroier por l'iver. Et lors s'en torna l'empereres Henris et tuit si baron vers Constantinople, qui mult furent lassé d'ostoier; et ot laissié à Andrinople entre les Grieus, un suen home qui ot nom Pierres de Radinghem, à tot dix chevaliers.

CV.

En cel termine, Théodore Lascaris qui tenoit la terre d'autre part del Braz devers la Turquie, avoit trèves à l'empereor Henri; et ne li ot mie bien tenues, ainz li ot faussées et brisiées. Et lors prist conseil l'emperere, et envoia oltre le Braz en sa cité de l'Espigal Pierre de Braiecuel cui sa terre ere devisée en iceles parties, et Paien d'Orléans, et Ansiau de Caieu, et Eustaice son frere, et grant part de ses bones genz, trosque à sept vins chevaliers. Et cil comencièrent la guerre contre Lascaris mult grant et mult fière, et fisent grant domage en sa terre.
Et chevauchièrent trosque à une terre qui Equise est apelée, que la mers clooit tote fors que une part. Et à l'entrée par où on entroit, avoit eu anciennement forteresce de murs, de tors et de fossez; et estoient auques descheu. Et enqui dedenz entra l'ost des François; et Pierres de Braiecuel, cui la terre ere devisée, les commença à refermer, et à faire deus chastiaus et deus entrées. Et d'iqui comencièrent à corre en la terre Lascaris, et gaaignèrent granz gaains et les proies. Et Lascaris revenoit sovent en Equise; et i ot maintes foiz assemblées, et i perdoient li un et li autre; et iqui ere la guerre grant et perilleuse.
Or lairons de ceus, si dirons de Thierri de Los, qui seneschaus ere, cui Nicomie devoit estre; et ere à une jornée de Niqué-la-grant, qui ere li chiés de la terre Lascaris. Et cil s'en rala à grant partie de la gent l'empereor Henri, et trova que li chastiaus ere abatuz; et ferma et horda le moustier Sainte-Sophie qui mult ere hauz et biels, et retint iqui endroit guerre.

CVI.

En icel termine, li marquis Bonifaces de Monferrat remut de Salonique, si s'en ala à la Serre que Johannis li avoit abatue; si la referma, et ferma après un chastel qui a nom Dramme, el val de Phelippe. Et tote la terre entor se rendi à lui et obéi; et iverna el païs.
Endementiers fu tant del tems passé que li Noels fu passez. Lors vindrent li message le marquis à l'empereor en Constantinople, et li distrent de par le marquis que il avoit envoié sa fille en galies, à la cité d'Aines. Et lors envoia l'empereres Henris Joffroi le mareschal de Romenie et de Champaigne, et Milon le Braibant, por querre la dame; et chevauchièrent par lor jornées tant que il vindrent à la cité d'Aines. Et trovèrent la dame, qui mult ere et bone et bele; et la saluèrent de par lor seignor Henri l'empereor de Constantinople, et l'amenèrent à grant honor en Constantinople. Et l'esposa l'empereres Henris au mostier Sainte Sophie, le dimenche après la feste madame sainte Marie Chandelor, à grant joie et à grant honor; et portèrent corone ambedui; et furent les noces hautes et plenières el palais de Bouchelion. Einsi fu faiz li mariages de l'empereor et de la fille le marquis Boniface, qui Agnès l'empereris avoit nom.

CVII.

Théodore Lascaris, qui guerroia l'empereor Henri, prist ses messages, si les envoia à Johannis le roi de Blaquie et de Bougrie. Si li manda que totes les gens l'empereor Henri estoient devers lui, qui le guerréoient d'autre part del Braz devers la Turquie; et que l'empereres ere en Constantinople à peu de gent; et or se poroit vengier, que il seroit d'une part, et il venist d'autre, et que l'empereres avoit si peu de gent il ne se poroit d'andeus defendre. Johannis s'ere porchaciez de grant ost de Comains qui venoient à lui; et porchaça ses os de Blacs et de Bougres, si granz com il onques pot. Et del temps fu jà tant passé que li quaresmes entra. Machaires de Sainte Manehault avoit commencié à fermer un chastel au Caracas, qui siet sor un golfe de mer à six lieues de Nichomie, devers Constantinople. Et Guillaume des Sains en comença un autre à fermer, le Chivetot, qui siet sor le golfe de Nichomie d'autre part, devers Niqué. Et sachiez que mult ot afaires l'empereres Henris endroit Constantinople, et li baron qui erent el païs. Et bien tesmoigne Joffrois de Vile-Hardoin li mareschaus de Romenie et de Champaigne, qui ceste œvre traita, que onc en nul termine ne furent gent si chargié de guerre, porce que il estoient espars en tant de lieus.

CVIII.

Lors issi Johannis de Blaquie à totes ses oz, et à grant ost de Cumains qui venu li erent, et entra en la Romenie. Et corurent li Commain trosque as portes de Constantinople; et il assist Andrinople, et i dreça trente trois pierrières granz qui getoient as murs et as tors. Et dedenz Andrinople n'avoit se les Grecs non, et Pierron de Radinghem, qui de par l'empereor i ere atot dix chevaliers. Et lors mandèrent li Grieu et li Latin ensemble l'empereor Henri que einsi les avoit Johannis assis, et que il les secorust.
Mult fu destroiz l'empereres quant il oï ce; que ses genz estoient departies outre le Braz en tant de lieus, et estoient en chascun lieu si chargié de guerre qu'il ne povoient plus; et l'empereres ere en Constantinople à peu de gent. Et fu tels ses conseils qu'il emprist à issir de Constantinople à tant de gent com il porroit avoir à la quinzaine de Pasque; et manda en Equise, où li plus de sa gent ere, qu'il s'en venissent à lui. Et il s'en commencièrent à venir par mer, Eustaices li freres l'empereor Henri, et Ansiaus de Caieu, et de lor gent li plus; et dont remest Pierres de Braiecuel et Paiens d'Orléans à peu de gent en Equise.
Quant Théodore Lascaris oï la novele que Andrinople ere assise, et que l'empmereres Henris par estovoir mandoit ses gens, et que il ne savoit auquel corre, ou deçà ou delà (si ere chargiez de la guerre), lors si manda plus efforciément quanque il pot de gent, et fist tendre ses trefs et ses paveillons devant les portes d'Equise; et y ot assemblé maintes foiz, et perdu et gaaigné. Et quant Théodore Lascaris vit que il avoient peu de gent laienz, si prist une grant partie de s'ost, et de vaissiaus ce que il en pot avoir par mer, si les envoia au castel del Chivetot que Guillaumes de Sainz fermoit; si l'asistrent par mer et par terre, le samedi de mi-quaresme. Laienz avoit quarante chevaliers de mult bone gent, et Machaires de Sainte Manehault en ere chevetaines; et lor chastiaus estoit encor peu fermez, si que cil povoient avenir à eus as espées et as lances. Et les assaillirent par mer et par terre mult durement; et cil assaus dura le samedi tote jor, et cil se desfendirent mult bien. Et bien tesmoigne li livres que onques à plus grant meschief ne se desfendirent quarante chevalier à tant de gent. Et bien y parut, que il n'en i ot mie cinq qui fussent navré de toz les chevaliers qui i estoient; et s'en y ot un mort, qui niés ere Milon le Braibant, qui avoit nom Giles.

CIX.

Ençois que cil assaus començast le samedi matin, s'en vint uns més batant en Constantinople, et trova l'empereor Henri el palais de Blaquerne, séant au mengier, et li dist: «Sire, sachiez que cil del Chivetot sont assis par mer et par terre; et se vos nes secorrez hastivement, il sont pris et mort.»
Avec l'empereor ere Coenes de Betune, et Joffrois li mareschaus de Champaigne, et Miles li Braibanz, et peu de genz. Et pristrent conseil; et li conseils si fu tels que l'empereres s'en vient au rivage, et s'en entre en un galion, et chascuns en tel vaissel com il pot avoir. Et lors fait crier par tote la ville que il le sievent, à tel besoing com por secorre ses homes; que il les a perduz se il ne les secort. Lors veissiez la cité de Constantinople mult esformier des Veniciens et des Pisans, et d'autres genz qui de mer savoient; et corent as vaissiaus, qui ainz ainz, qui mieuz mieuz. Avec eus entroient li chevalier à totes lor armes; et qui ançois povoit, ançois se partoit del port por sivre l'empereor.
Einsi alèrent à force de rames, tote la vesprée tant com jorz lor dura, et tote la nuit trosqua à l'endemain au jor. Et quant vint à une pièce après le soleil levant, si ot tant esploitié l'emperereres Henris que il vit le Chivetot, et l'ost qui ere entor et par mer et par terre. Et cil dedenz n'orent mie dormi la nuit; ainz se furent tote nuit hordé, si malade et si navré com il estoient, et com cil qui n'atendoient se la mort non. Et quant l'empereres vit que il estoient si près que il voloient assaillir, et il n'avoit encor de sa gent se peu non (avec lui ere Joffrois li mareschaus en un autre vaissel, et Miles li Braibanz, et Pisan et autre chevalier; et tant que il avoient, entre granz et petiz, de vaissiaus dix sept, et cil en avoient bien soixante), et virent que se il atendoient lor genz et soffroient que cil assaillissent ceus de Chivetot, que il seroient mort ou pris, si fu tels lor conseils que il s'iroient combatre à ceus de la mer. Et voguèrent cele part tuit d'un front, et furent tuit armé es vaissiaus, les hiaumes laciez. Et quant cil les virent venir qui estoient tuit apareillié d'assaillir, si conurent bien que ce ere secors; si se partirent del chastel et vinrent encontre eus; et tote lor ost se loja sur le rivage, de granz genz que il avoient à pié et à cheval. Et quant il virent que l'emperere et la soe gens viendroient totes voies sur eus, si reculèrent sur lor gent qui estoient sor le rivage, si que cil lor povoient aidier de traire et de lancier.
Einsi les tint l'empereres assis à ses dix sept vaissiaus, tant que li criz vint qui ere meuz de Constantinople; et ainçois que la nuit venist, en i ot tant venuz que il orent la force en la mer partot; et jurent tote nuit armé, et aancrez lor vaissiaus. Et fu lor conseils tels que si tost com il verroient le jor, que il s'iroient combatre à eus el rivage por tollir lor vaissiaus. Et quant vint endroit la mie-nuit, si traistrent li Grieu toz lors vaissiaus à terre, si boutèrent le feu dedenz et les artrent toz, et se deslogièrent, et s'en alèrent fuiant. L'empereres Henri et sa gens furent mult lié et joiant de la victoire que Dieu lor ot donée, et de ce que il orent secoru lor gent. Et quant vint au matin, l'empereres et tuit li autre s'en vont au chastel del Chivetot; et trovèrent lor genz mult malades et mult navrées les plusors. Et le chastel esgarda l'empereres et sa genz, et virent que il ere si faibles que il ne faisoit à tenir. Si recueillirent totes lor genz es vaissiaus, et guerpirent le chastel et laissièrent. Einsi repaira li empereres Henris en Constantinople.

CX.

Johannis li rois de Blaquie ne reposa mie, qui avoit Andrinople assise; ainz jetèrent ses pierrières, dont il avoit assez, et par jor et par nuit, aus murs et aus tors, et empirièrent mult les murs et les tors. Et mist ses trencheors aus murs, et firent maintes fois assaillies. Et mult se contindrent bien cil qui dedenz estoient, li Grieu et li Latin; et mandèrent mult sovent l'empereor Henri que il les secourust, et seust que se il nes secouroit, que il estoient perdu sans nule fin. Et l'empereres ere mult destruiz, que quant il voloit ses genz d'Andrinople aler secore d'une part, Théodore Lascaris le tenoit si destroit d'autre part, si que par estovoir le convenoit à retorner. Et einsi fu Johannis tot le mois d'avril devant Andrinople; et l'aprocha si de prendre qu'il abati des murs et des tors en deus lieus trosque en terre, et si que il povoient venir main à main as espées et à lances à ceus dedenz. Einsi y fist de mult granz assaus, et cil se defendirent bien; et i ot mult des morz et des navrez d'une part et d'autre.
Einsi com Dieu veut les aventures avenir, li Commain qu'il ot envoié par la terre orent mult gaaigné; et furent revenu à l'ost d'Andrinople à toz lor gaaingz; et distrent que il n'i remanroient plus à Johannis, ainz s'en voloient aler en lor terre. Einsi se partirent li Commain de Johannis; et com il vit ce, si n'osa remanoir sanz eus devant Andrinople. Einsi se parti de devant la ville, et la guerpi. Et sachiez que on le tint à grant miracle, de ville qui ere aprochiée de prandre com ere ceste, que il la laissa, qui hom si poeteis ere. Einsi com Dieu veut les choses, si les convient avenir. Cil d'Andrinople ne tardèrent mie de mander l'empereor que il venist tost por Dieu; que seust de voir que se Johannis li rois de Blaquie retornoit, que il estoient mort ou pris.

CXI.

L'empereres, à tant de gent com il avoit, fu atornez d'aler à Andrinople. Et lors li vint une novele qui mult fu griève, que Esturions, qui ere amirals des galies Lascaris, ere entrez à dix et sept galies en Boche d'Avie, el Braz Saint George, et fu venuz en Equise, où Pierres de Braiecuel estoit et Paiens d'Orléans, et le assist par devers mer, et Lascaris par devers terre. Et la gens de la terre d'Equise furent revelé contre Pierron de Braiecuel, et cil de Marmora, qui suen estoient; et il orent fait grant domage, et morz de ses homes assez.
Et quant ceste novele vint en Constantinople, si furent mult effreé. Lors prist conseil l'empereres Henris à ses homes et à ses barons et as Veniciens ensamble; et distrent que se il ne secoroient Pierron de Braiecuel et Paien d'Orléans, que il estoient mort et que il avoient la terre perdue. Si armèrent mult isnellement quatorze galies, et les garnirent des plus hautes gens des Veniciens et de toz les barons l'empereor. En une entra Coenes de Betune et sa gens; et en l'autre Joffrois de Ville-Hardoin li mareschaus, et la soe gens; et en la tierce Machaires de Sainte Manehault et la soe gens; en la quarte Miles li Braibans; et en la quinte Ansiaus de Caieu; et en la sixte Thierris de Los, qui ere seneschaus de Romenie; et en la septime Guillaumes del Perchoi; et en l'uitisme Eustaiches li freres l'empereor. Et einsi mist par totes ses galies sa meillor gent l'empereres Henris. Quant eles partirent del port de Constantinople, bien distrent totes les genz qui les virent, que onques mais galies ne furent mieuz armées ne de meillors genz. Et einsi fu respitiez li alers de Andrinople à cele foiz.
Et cil des galies s'en alèrent contreval le Braz, vers Equise droit. Ne sai comment Esturions le sot, li amiraus des galies Lascaris: si s'en parti de Equise et s'en ala, et s'enfui contreval le Braz. Et cil le chacièrent deus jorz et deuz nuiz trosque fors le Boche d'Avie, bien quarante miles. Et quant il virent que il nel poroient ateindre, si tornèrent arrière et revindrent en Equise, et trovèrent Pierron de Braiecuel et Paien d'Orléans; et Lascaris se fu deslogiez de devant, et fu repairiez arrière en sa terre. Einsi fu secorue Equise com vos oez; et cil des galies s'en tornèrent arrière en Constantinople, et ratornèrent lor oirre vers Andrinople.

CXII.

Théodore Lascaris envoia le plus de sa gent en la terre de Nichomie. Et la gent Thierri de Los, qui avoient fermé le mostier Sainte Sophie, et estoient dedenz, mandèrent lor seignor et l'empereor que il les secorust; que se il n'avoient secors, il ne se poroient tenir, et ensorquetot si n'avoient point de viande. Par fine destrece convint l'empereor Henri, et sa gent, que il laissast la voie d'aler à Andrinople, et que il passast le Braz Saint George devers la Turquie, à tant de gent com il pot avoir, por secorre Nichomie. Et quant la gens Lascaris l'oïrent que il venoit, si revuidièrent la terre, si se traistrent arrière vers Niqué-la-Grant. Et quant l'empereres le sot, si prist son conseil; et fu li conseils tels que Thierris de Los, li seneschaus de Romenie, remanroit à Nichomie à toz ses chevaliers et à toz ses serjanz por garder la terre, et Machaires de Sainte Manehaut au Caracas, et Guillaumes del Perchoi en Equise, et cil deffendroient la terre endroit eus.
Lors s'en rala l'empereres Henris en Constantinople au remanant de sa gent, et ot empris de rechief de movoir por raler vers Andrinople. Et endementiers qu'il atorna son oirre, Thierris de Los li seneschaus, qui ere à Nichomie, et Guillaumes del Perchoi, à totes lor genz, alèrent forer un jor. Et la genz Lascaris le surent; si les sorpristrent et lor corurent sus. Si furent mult grant gent, et cil furent peu; si comença li estors et la mellée: ne demora mie longuement que li peu ne porent endurer le trop. Mult le fist bien Thierris de Los et sa gens; et fu abatuz deus foiz, et par force le remontèrent sa gens. Et Guillaumes del Perchoi fu abatuz et remontez, et fu rescous. Mais ne porent cele foule soffrir, si furent desconfit li Franc. Là fu pris Thierris de Los, et navrez parmi le vis, et en aventure de mort; là fu pris li plus de sa gent avec lui, que peu en eschapa. Et Guillaumes del Perchoi en eschapa sor un roncin, navrez en la main. Et einsi se recueillirent el mostier Sainte-Sophie cil qui en eschapèrent de la desconfiture.
Cil qui ceste hystoire traita ne sot s'il fu à tort ou à droit, mais il en oï un chevalier blamer, qui avoit à nom Ansols de Remi, qui ere hom liges Thierri de Los le seneschal, et chevetaines de sa gent, et le guerpi.
Et lors pristrent un message cil qui furent à Nichomie au mostier Sainte-Sophie retorné (Guillaumes del Perchoi et Ansols de Remi), et l'en envoièrent batant en Constantinople à l'empereor Henri; et li mandèrent qu'einsi ere avenu, que pris ere li seneschaus et sa gens, et il estoient assis au mostier Sainte Sophie à Nichomie, et n'avoient mie viande à plus de cinq jors; et seust de voir que se il nes secoroit, que il estoient mort et pris. L'empereres, autresi com à cri, passe le Braz Saint George, il et sa gent, qui ainz ainz, qui mieuz mieuz, por secoure ceus de Nichomie. Et einsi fu remise la voie d'Andrinople à cele foiz.
Et quant l'empereres ot passé le Braz Saint-George, si ordena ses batailles, et chevaucha par ses jornées tant que il vint à Nichomie. Quant la gent Lascaris et si frere l'oïrent, qui tenoient l'ost, si se traistrent arrière, et passèrent la montaigne d'autre part devers Niqué. Et l'empereres se loja d'autre part Nichomie, en une mult bele praerie sor un flum, par devers la montaigne. Et fist tendre ses trefs et ses paveillons, et fist corre sa gent par le païs (quar il se revelèrent quant il oïrent dire que Thierris de Los li seneschaus de Romenie ere pris); et pristrent proies assez et prisons.

CXIII.

Einsi sejorna l'empereres Henris par cinq jorz en la praerie. Et dedens cel sejor, Théodore Lascaris prist ses messages, si les envoia à lui; et si le requist qu'il prendroit treve à deus anz, par tel covent que il li laisast abatre Equise et la forteresce del mostier Sainte Sophie de Nicomie; et il li rendroit toz ses prisons (qui avoient esté pris à cele desconfiture, et aus autres lieus), dont il avoit assez en sa terre. Or prist l'emperere conseil à ses homes, et distrent que il ne povoient les deus guerres souffrir ensemble, et que mieuz valoit cel domaige à soffrir que la perte d'Andrinople ne de l'autre terre; et si auroient parti lor anemis (Johannis le roi de Blaquie et de Bougrie, et Lascaris), qui estoient ami et s'entr'aidoient de la guerre.
Einsi fu la chose creantée et otroiée. Et lors manda l'empereres Henris Pierron de Braiecuel en Equise, et il i vint; et fist tant l'empereres Henris vers lui, que il li delivra Equise; et la delivra à Lascaris por abatre, et le mostier de Sainte Sophie de Nichomie. Einsi fu ceste treve asseurée, et ces forteresces abatues. Thierris de Los fu delivrés, et li autre prison tuit. Lors s'en repaira l'empereres Henris en Constantinople, et enprist à aler vers Andrinople à tant com il poroit de gent avoir. Et asambla s'ost à Salembrie; et fu jà tant del temps passé que il fu après la feste saint Johan en juillet. Et chevaucha tant par ses jornées que il vint à Andrinople, et se herberja es préz devant la ville. Et cil de la cité qui mult l'avoient desiré, issirent fors à procession, si le virent mult volentiers; et tuit li Grieu de la terre furent venu. Il ne sejorna qu'un jor devant la ville, tant qu'il ot veu le domage que Johannis i avoit fait à ses trencheors et à ses pierrières, as murs et as tors, qui mult avoient la ville empiriée. Et l'endemain si mut et chevaucha vers la terre Johannis, et chevaucha par quatre jorz. Et au cinquiesme jor, si vint au pié de la montaigne de Blaquie, à une cité qui avoit nom Eului, que Johannis avoit novelement repeuplée de gent. Et quant la gens de la terre virent l'ost venir, si guerpirent la cité, et fuirent es montaignes.

CXIV.

L'empereres Henris et l'ost des François se logea devant la ville, et li coureor corrurent parmi la terre, et gaaignerent beus et vaches et bufles à grant plenté, et autres bestes. Et cil d'Andrinople, qui avoient lor chars mené avec eus, et erent povre et diseteus de la viande, les chargièrent de froment et d'autre blé; et il trovèrent grant plenté de la viande, et les autres chars qu'il avoient gaaigné, chargièrent à mult grant plenté. Einsi sejorna l'ost par trois jorz, et chascun jor aloient gaaigner li coureor parmi la terre; et la terre si ere plaine de montaignes et de fors destroiz; si i perdoient cil de l'ost de lor coreors qui aloient folement. Au derrain, envoia l'empereres Henris Ansel de Caeu por garder les correors, et Eustaice son frere, et Thierri de Flandres son neveu, et Gautier de Escornai, et Johan Bliaut. Ices quatre batailles alèrent garder les correors, et entrèrent dedenz mult forz montaignes. Et quant lor gens orent couru par la terre et il s'en vourent revenir, si troverent les destroiz mult forz. Et li Blac del païs se furent assemblé, et assanblerent à eus, et lor firent mult grant domage, et d'homes et de chevaus. Et furent mult près d'estre desconfiz, si que par vive force convint les chevaliers descendre à pié. Et par l'aide Dieu s'en revindrent tote voie à l'ost; mais grant domage orent receu. Et l'endemain, s'en parti l'empereres Henris et l'ost des François; et chevauchièrent par lor jornées arrières, tant que il vindrent à la cité d'Andrinople. Et i mistrent la garnison qu'il amenèrent de blez et d'autre viande; et séjorna l'empereres, en la praerie defors la vile, bien quinze jorz.

CXV.

En cel termine, Bonifaces li marquis de Monferrat, qui ere à la Serre, que il avoit refermée, fist chevauchiées trosque à Messinople, et la terre se rendi à son comandement. Lors prist ses messages, si les envoia à l'empereor Henri, et li manda que il parleroit volentiers à lui sor le flum qui cort soz la Quipesale. Et il n'avoient mais eu povoir de parler ensemble, trosque la terre fu conquise, que il avoit tant de lor anemis entre eus, que li uns ne povoit venir à l'autre. Et quant l'empereres et ses conseils oï que li marquis Bonifaces ere à Messinople, si en furent mult lié. Et li manda par ses messages arrière que il iroit parler à lui au jor que il avoit mis.
Einsi s'en ala l'empereres vers cele part, et laissa Conon de Betune por garder la terre à Andrinople à tot cent chevaliers. Et vindrent là où li jorz fu pris, en une mult bele praerie près de la cité de la Quipesale; et vint l'empereres d'une part, et li marquis d'autre, et s'assemblèrent à mult grant joie; et ne fu mie merveille, que il ne s'erent pieça veu. Et li marquis demanda à l'empereor novelles de sa fille l'empereris Agnès; et il li dist que ele ere grosse d'enfant, et il en fu liez et joianz. Lors devint li marquis hom de l'empereor Henri, et tint de lui sa terre einsi com il avoit fait l'empereor Baudoin, son frere. Lors dona li marquis Bonifaces à Geffroi de Ville-Hardoin, le mareschal de Romenie et de Champaigne, la cité de Messinople à totes ses apartenances, ou cele de la Serre (laquelle que il ameroit mieuz); et cil en fu ses hom liges, sauve la fealté l'empereor de Constantinople. Et einsi sejornèrent par deus jorz en cele praerie à mult grant joie, et distrent (puis que Dieu avoit doné que il povoient venir ensemble) que encore porroient il grever lor anemis. Et en pristrent un parlement que il seroient à l'issue d'esté, el mois d'octobre, à tot lor povoir, en la praerie de la cité d'Andrinople, por hostoier sor le roi de Blaquie. Et einsi departirent mult lié et mult haitié: li marquis s'en ala à Messinople, et l'empereres Henris vers Constantinople.

CXVI.

Quant li marquis fu à Messinople, ne tarda mie plus de cinq jors que il fist une chevauchiée par le conseil as Greus de la terre, en la montaigne de Messinople, plus d'une grant jornée loing. Et com il ot esté en la terre et vint au partir, li Bougre de la terre se furent assemblé; et virent que li marquis fu à peu de gent. Et vienent de totes parz, si s'assemblent à s'arrière garde. Et quant li marquis oï le cri, si sailli en un cheval toz desarmez, un glaive en sa main. Et com il vint là où il estoient assemblé à s'arrière garde, si lor corut sus, et les chaça une grant pièce arrière. La fu feruz d'une sajete li marquis Bonifaces de Monferrat, parmi le gros del braz desouz l'espaule, mortelment, si que il comença à espandre del sanc. Et quant sa gent virent ce, si se comencierent à esmaier et à desconforter, et à mauvaisement maintenir. Et cil qui furent entor le marquis le sostindrent, et il perdi mult del sanc; si se comença à pasmer. Et quant ses genz virent que il n'auroient nule aide de lui, si s'escomencierent à esmaier; et le comencent à laissier. Einsi furent desconfit par ceste mesaventure; et cil qui remestrent avec lui (et ce fu peu) furent mort.
Et li marquis Bonifaces de Monferrat ot la teste colpée; et la gens de la terre envoièrent Johannis la teste, et ce fu une des graignors joies que il eust onques. Halas! com doloreus domage ci ot à l'empereor Henri et à tos les Latins de la terre de Romenie, de tel homme perdre par tel mesaventure, un des meillors barons et des plus larges, et des meillors chevaliers qui fust el remanant dou monde. Et ceste mesaventure avint en l'an de l'incarnation Jesu-Crist mil deus cens et sept anz.

EXPLICIT.